pas aate hain mere aur na bulate hain mujhe

paas aate haiñ mire aur na bulāte haiñ mujhe

ye bhī kyā kam hai ki vo yaad to aate haiñ mujhe

daa.im ābād rahe yuuñ hī bharī bazm un kī

ban ke ḳhud sham' jo parvāna banāte haiñ mujhe

husn-e-mahbūb-e-ḳhudā par jo nazar karatā huuñ

us kī qudrat ke tamāshe nazar aate haiñ mujhe

jaane kyā baat hai kyuuñ log maze lete haiñ

naam le kar tirā dīvāna banāte haiñ mujhe

sadqa-e-husn-e-nazar hai mirī hastī saarī

un ke qurbān jo āñkhoñ se pilāte haiñ mujhe

zindagānī hai dar-e-ġhaus ke TukḌoñ pe mirī

chhīn kyā leñge vo mujh se jo Darāte haiñ mujhe

merī kyā buud hai sab un kā vujūd un kī numūd

kaise nādāñ haiñ jo sāmne laate haiñ mujhe

jānte haiñ ki nahīñ un ke sivā merā koī

kuchh samajh kar hī vo dāman meñ chhupāte haiñ mujhe

sar ke bal jā۔ūñ agar par huuñ to uḌ kar pahuñchūñ

koī kah de jo mire piir bulāte haiñ mujhe

kahiye kis 'ḳhusrav'-e-ḳhūbāñ kī hai aamad 'kāmil'

rū-numā.ī meñ do-'ālam nazar aate haiñ mujhe

pas aate hain mere aur na bulate hain mujhe

ye bhi kya kam hai ki wo yaad to aate hain mujhe

daim aabaad rahe yun hi bhari bazm un ki

ban ke KHud sham' jo parwana banate hain mujhe

husn-e-mahbub-e-KHuda par jo nazar karata hun

us ki qudrat ke tamashe nazar aate hain mujhe

jaane kya baat hai kyun log maze lete hain

nam le kar tera diwana banate hain mujhe

sadqa-e-husn-e-nazar hai meri hasti sari

un ke qurban jo aankhon se pilate hain mujhe

zindagani hai dar-e-ghaus ke TukDon pe meri

chhin kya lenge wo mujh se jo Daraate hain mujhe

meri kya bud hai sab un ka wujud un ki numud

kaise nadan hain jo samne late hain mujhe

jaante hain ki nahin un ke siwa mera koi

kuchh samajh kar hi wo daman mein chhupate hain mujhe

sar ke bal ja۔un agar par hun to uD kar pahunchun

koi kah de jo mere pir bulate hain mujhe

kahiye kis 'KHusraw'-e-KHuban ki hai aamad 'kaamil'

ru-numai mein do-'alam nazar aate hain mujhe