tumhaare jalwe chhupe hain kahin chhupane se

tumhāre jalve chhupe haiñ kahīñ chhupāne se

jhalak rahī hai haqīqat har ik fasāne se

maiñ tum ko dekh ke jiitā huuñ ik zamāne se

mujhe na duur karo apne āstāne se

ye kis ne mere nasheman meñ bijliyāñ bhar diiñ

chaman ko aag na lag jaa.e āshiyāne se

zabāñ rukegī magar chashm-e-tar ko kyā kiije

chhupā hai soz-e-mohabbat kahīñ chhupāne se

bujhegī tujh se na ai chāragar lagī dil kī

ye aag aur bhaḌak jā.egī bujhāne se

ye nasha vo hai jo utrā hai aur na utregā

chale haiñ pī ke ham ik aise bāda-ḳhāne se

kisī ko dair kisī ko haram mubārak ho

mujhe to kaam hai bas tere āstāne se

mujhe bhī bhiik nigāh-e-karam kī mil jaa.e

paḌā huuñ dar pe tire maiñ bhī ik zamāne se

tumhāre dar pe marūñ mar ke ḳhaak ho jā.ūñ

ḳhudā kare mirī miTTī lage Thikāne se

jo mere saath hai 'kāmil' ye kyā tamāshā hai

usī se milne kī hasrat hai ik zamāne se

tumhaare jalwe chhupe hain kahin chhupane se

jhalak rahi hai haqiqat har ek fasane se

main tum ko dekh ke jita hun ek zamane se

mujhe na dur karo apne aastane se

ye kis ne mere nasheman mein bijliyan bhar din

chaman ko aag na lag jae aashiyane se

zaban rukegi magar chashm-e-tar ko kya kije

chhupa hai soz-e-mohabbat kahin chhupane se

bujhegi tujh se na ai chaaragar lagi dil ki

ye aag aur bhaDak jaegi bujhane se

ye nasha wo hai jo utra hai aur na utrega

chale hain pi ke hum ek aise baada-KHane se

kisi ko dair kisi ko haram mubarak ho

mujhe to kaam hai bas tere aastane se

mujhe bhi bhik nigah-e-karam ki mil jae

paDa hun dar pe tere main bhi ek zamane se

tumhaare dar pe marun mar ke KHak ho jaun

KHuda kare meri miTTi lage Thikane se

jo mere sath hai 'kaamil' ye kya tamasha hai

usi se milne ki hasrat hai ek zamane se