raaz-e-dil kisi unwan lab pe la nahin sakte

rāz-e-dil kisī 'unvāñ lab pe lā nahīñ sakte

aap ḳhud samajh liije ham batā nahīñ sakte

aag sī bhaḌaktī hai aur bujhā nahīñ sakte

dil ko rog ye kyā hai kuchh batā nahīñ sakte

jabr-o-zulm se dil tak baar pā nahīñ sakte

gardaneñ jhukā loge dil jhukā nahīñ sakte

kuchh to khul ke rone do kis liye hameñ chheḌā

jab kisī ke rone kī taab lā nahīñ sakte

hai hamārī nazroñ meñ zindagī gulistāñ kī

ab to un bahāroñ se dil lagā nahīñ sakte

dafn bhī vahīñ hoñge zindagī jahāñ kaaTī

mar ke bhī tire dar se ham to jā nahīñ sakte

vo qadam hī kyuuñ rakheñ manzil-e-mohabbat meñ

aap ke sitam jin ko raas aa nahīñ sakte

sāmne na ho jab tak ik tajalli-e-masjūd

ham kisī bhī qīmat par sar jhukā nahīñ sakte

saaz zindagī jab tak be sadā na ho 'kāmil'

un se haT ke ham koī giit gā nahīñ sakte

raaz-e-dil kisi 'unwan lab pe la nahin sakte

aap KHud samajh lije hum bata nahin sakte

aag si bhaDakti hai aur bujha nahin sakte

dil ko rog ye kya hai kuchh bata nahin sakte

jabr-o-zulm se dil tak bar pa nahin sakte

gardanen jhuka loge dil jhuka nahin sakte

kuchh to khul ke rone do kis liye hamein chheDa

jab kisi ke rone ki tab la nahin sakte

hai hamari nazron mein zindagi gulistan ki

ab to un bahaaron se dil laga nahin sakte

dafn bhi wahin honge zindagi jahan kaTi

mar ke bhi tere dar se hum to ja nahin sakte

wo qadam hi kyun rakhen manzil-e-mohabbat mein

aap ke sitam jin ko ras aa nahin sakte

samne na ho jab tak ek tajalli-e-masjud

hum kisi bhi qimat par sar jhuka nahin sakte

saz zindagi jab tak be sada na ho 'kaamil'

un se haT ke hum koi git ga nahin sakte