رازِ دل کسی عنواں لب پہ لا نہیں سکتے

رازِ دل کسی عنواں لب پہ لا نہیں سکتے

آپ خود سمجھ لیجے، ہم بتا نہیں سکتے

آگ سی بھڑکتی ہے اور بجھا نہیں سکتے

دل کو روگ یہ کیا ہے، کچھ بتا نہیں سکتے

جبر و ظلم سے دل تک بار پا نہیں سکتے

گردنیں جھکا لو گے، دل جھکا نہیں سکتے

کچھ تو کھل کے رونے دو، کس لیے ہمیں چھیڑا

جب کسی کے رونے کی تاب لا نہیں سکتے

ہے ہماری نظروں میں زندگی گلستاں کی

اب تو ان بہاروں سے دل لگا نہیں سکتے

دفن بھی وہیں ہوں گے زندگی جہاں کاٹی

مر کے بھی ترے در سے ہم تو جا نہیں سکتے

وہ قدم ہی کیوں رکھیں منزلِ محبت میں

آپ کے ستم جن کو راس آ نہیں سکتے

سامنے نہ ہو جب تک اک تجلیِ مسجود

ہم کسی بھی قیمت پر سر جھکا نہیں سکتے

سازِ زندگی جب تک بے صدا نہ ہو کاملؔ

ان سے ہٹ کے ہم کوئی گیت گا نہیں سکتے