unhin ki marzi pe chal raha hun unhin ki marzi to chal rahi hai

unhīñ kī marzī pe chal rahā huuñ unhīñ kī marzī to chal rahī hai

ye zindagī to faqat unhīñ kī ḳhushī ke sāñchoñ meñ Dhal rahī hai

na dam hī puurā nikal rahā hai na aarzū hī nikal rahī hai

na jaane kab se tirī tamannā hamārī godī meñ pal rahī hai

use to mahsūs kar sakegī faqat koī chashm-e-bāda-kash hī

kisī kī āñkhoñ se kyā batā.ūñ sharāb kitnī ubal rahī hai

unhīñ kī chashm-e-karam kā sadqa unhīñ ke ye dam-qadam kā sadqa

unhīñ se nisbat kī aaḌe lekar hamārī har baat chal rahī hai

qafas se āzād hone vaale nigāh-e-taqayyud khone vaale

mubārak ab zindagī kī sūrat kuchh aur 'unvān badal rahī hai

bilā-ta'ayyun jahāñ hoñ jalve vahāñ tire kyā paḌegā palle

nazar hadd-e-e.atibār se kyuuñ qadam baḌhā kar nikal rahī hai

vo e'tibār-e-nazar se ūñche ho fikr-o-faham bashar se ūñche

maiñ jitnī qurbat baḌhā rahā huuñ vo dūriyoñ se badal rahī hai

rahe salāmat vo aane vaalā marīz ġham ne liyā sambhālā

zarā zarā hosh aa rahā hai zarā tabī'at sambhal rahī hai

lagā jahāñ dil pe daaġh 'kāmil' charāġh raushan murād hāsil

hamārī marqad pe aa ke dekho yahī to ik sham' jal rahī hai

unhin ki marzi pe chal raha hun unhin ki marzi to chal rahi hai

ye zindagi to faqat unhin ki KHushi ke sanchon mein Dhal rahi hai

na dam hi pura nikal raha hai na aarzu hi nikal rahi hai

na jaane kab se teri tamanna hamari godi mein pal rahi hai

use to mahsus kar sakegi faqat koi chashm-e-baada-kash hi

kisi ki aankhon se kya bataun sharab kitni ubal rahi hai

unhin ki chashm-e-karam ka sadqa unhin ke ye dam-qadam ka sadqa

unhin se nisbat ki aaDe lekar hamari har baat chal rahi hai

qafas se aazad hone wale nigah-e-taqayyud khone wale

mubarak ab zindagi ki surat kuchh aur 'unwan badal rahi hai

bila-ta'ayyun jahan hon jalwe wahan tere kya paDega palle

nazar hadd-e-eatibar se kyun qadam baDha kar nikal rahi hai

wo e'tibar-e-nazar se unche ho fikr-o-faham bashar se unche

main jitni qurbat baDha raha hun wo duriyon se badal rahi hai

rahe salamat wo aane wala mariz gham ne liya sambhaala

zara zara hosh aa raha hai zara tabi'at sambhal rahi hai

laga jahan dil pe dagh 'kaamil' charagh raushan murad hasil

hamari marqad pe aa ke dekho yahi to ek sham' jal rahi hai