soch kar aaen meri rah mein aane wale

soch kar aa.eñ mirī raah meñ aane vaale

un ke jalve haiñ yahāñ hosh uḌāne vaale

tere qurbān hijābāt meñ aane vaale

ye to parde haiñ tujhe sāmne laane vaale

shiddat-e-jalva-garī meñ na chhupā muñh apnā

be-hijābī ko ḳhud ik parda banāne vaale

kaun rahtā hai ba-juz jalva dam-e-nazzāra

aap ko pā na sake aap ko paane vaale

le uḌe aap se nisbat kī havā paate hī

merī har baat ko afsāna banāne vaale

terā mamnūn 'ināyat hai mirā har ehsās

tere qurbāñ mire afkār pe chhāne vaale

vo kisī aur ko ab dil meñ jagah kyā deñge

aap ke husn ko me'yār banāne vaale

ek dhun ek tasavvur kā mazā kyā jāneñ

sau tarīqoñ se ḳhayālāt pakāne vaale

fazl kī baat alag fikr kā uslūb judā

kyā kareñge mirī tarkīb uḌāne vaale

zulm baaqī na sahī zulm kī tārīḳh to hai

miT ke ḳhud rah ga.e duniyā ko miTāne vaale

huuñ maiñ vo naqsh jo mai se ubhar aatā ho

mere dushman nahīñ mohsin haiñ miTāne vaale

'kāmil' aise to bahut kam nazar aa.e saaqī

sab kahāñ hote haiñ āñkhoñ se pilāne vaale

soch kar aaen meri rah mein aane wale

un ke jalwe hain yahan hosh uDane wale

tere qurban hijabaat mein aane wale

ye to parde hain tujhe samne lane wale

shiddat-e-jalwa-gari mein na chhupa munh apna

be-hijabi ko KHud ek parda banane wale

kaun rahta hai ba-juz jalwa dam-e-nazzara

aap ko pa na sake aap ko pane wale

le uDe aap se nisbat ki hawa pate hi

meri har baat ko afsana banane wale

tera mamnun 'inayat hai mera har ehsas

tere qurban mere afkar pe chhane wale

wo kisi aur ko ab dil mein jagah kya denge

aap ke husn ko me'yar banane wale

ek dhun ek tasawwur ka maza kya jaanen

sau tariqon se KHayalat pakane wale

fazl ki baat alag fikr ka uslub juda

kya karenge meri tarkib uDane wale

zulm baqi na sahi zulm ki tariKH to hai

miT ke KHud rah gae duniya ko miTane wale

hun main wo naqsh jo mai se ubhar aata ho

mere dushman nahin mohsin hain miTane wale

'kaamil' aise to bahut kam nazar aae saqi

sab kahan hote hain aankhon se pilane wale