ishq ki barbaadiyon ki phir nai tamhid hai

'ishq kī barbādiyoñ kī phir na.ī tamhīd hai

zaḳhm-e-dil taaza hue haiñ mere ghar meñ 'iid hai

duur haiñ qadmoñ se tere tere qadmoñ kī qasam

be-kasoñ kī 'iid bhī kis be-kasī kī 'iid hai

DhūñDhtā phirtā hai tujh ko chāhne vaalā tirā

banda-parvar kyā usī kā naam roz-e-'īd hai

terī sūrat ke liye āñkheñ taras kar rah ga.iiñ

mere ghar mātam bapā hai sab ke ghar meñ 'iid hai

vo bhī din the ham tire hamrāz the dam-sāz the

ek vo bhī 'iid thī aur ek ye bhī 'iid hai

haq to ye hai mere haq meñ 'iid kā chāñd aap haiñ

jis kisī din aap aa.eñ bas usī din 'iid hai

muskurā kar tum ne dekhā dil uchhalne lag gayā

muḳhtasar sī zindagī hai muḳhtasar sī 'iid hai

ai mah-e-shavval kah abru-e-jānāñ kī qasam

vo hilāl-e’-īd haiñ yā tū hilāl-e-’īd hai

kaun manzūr-e-nazar Thahrā hai 'kāmil' kyā ḳhabar

yaar kī chashm-e-karam jis par hai us kī 'iid hai

'ishq ki barbaadiyon ki phir nai tamhid hai

zaKHm-e-dil taza hue hain mere ghar mein 'id hai

dur hain qadmon se tere tere qadmon ki qasam

be-kason ki 'id bhi kis be-kasi ki 'id hai

DhunDhta phirta hai tujh ko chahne wala tera

banda-parwar kya usi ka nam roz-e-'id hai

teri surat ke liye aankhen taras kar rah gain

mere ghar matam bapa hai sab ke ghar mein 'id hai

wo bhi din the hum tere hamraaz the dam-saz the

ek wo bhi 'id thi aur ek ye bhi 'id hai

haq to ye hai mere haq mein 'id ka chand aap hain

jis kisi din aap aaen bas usi din 'id hai

muskura kar tum ne dekha dil uchhalne lag gaya

muKHtasar si zindagi hai muKHtasar si 'id hai

ai mah-e-shawwal kah abru-e-jaanan ki qasam

wo hilal-e’-id hain ya tu hilal-e-’id hai

kaun manzur-e-nazar Thahra hai 'kaamil' kya KHabar

yar ki chashm-e-karam jis par hai us ki 'id hai