عشق کی بربادیوں کی پھر نئی تمہید ہے

عشق کی بربادیوں کی پھر نئی تمہید ہے

زخمِ دل تازہ ہوئے ہیں میرے گھر میں عید ہے

دور ہیں قدموں سے تیرے، تیرے قدموں کی قسم!

بے کسوں کی عید بھی کس بے کسی کی عید ہے؟

ڈھونڈھتا پھرتا ہے تجھ کو چاہنے والا ترا

بندہ پرور! کیا اسی کا نام روزِ عید ہے؟

تیری صورت کے لیے آنکھیں ترس کر رہ گئیں

میرے گھر ماتم بپا ہے، سب کے گھر میں عید ہے

وہ بھی دن تھے ہم ترے ہم راز تھے دم ساز تھے

ایک وہ بھی عید تھی اور ایک یہ بھی عید ہے

حق تو یہ ہے، میرے حق میں عید کا چاند آپ ہیں

جس کسی دن آپ آئیں، بس اسی دن عید ہے

مسکرا کر تم نے دیکھا، دل اچھلنے لگ گیا

مختصر سی زندگی ہے، مختصر سی عید ہے

اے مہ شول! کہہ ابروئے جاناں کی قسم!

وہ ہلالِ عید ہیں یا تو ہلالِ عید ہے

کون منظورِ نظر ٹھہرا ہے کاملؔ کیا خبر؟

یار کی چشمِ کرم جس پر ہے اس کی عید ہے