junun mein jo kuchh main kah raha hun maqam-e-hairat ki guftugu hai

junūñ meñ jo kuchh maiñ kah rahā huuñ maqam-e-hairat kī guftugū hai

ḳhabar nahīñ kis ko dekhtā huuñ pata nahīñ kaun rū-ba-rū hai

ye ḳhud bhī ik tafarqe hai kahnā jo tū hai maiñ huuñ jo maiñ huuñ tū hai

tire sivā dūsrā nahīñ hai ki tū hī ḳhud tere rū-ba-rū hai

khulī jo mujh par mirī haqīqat to sab izāfī thī merī nisbat

jab un nigāhoñ se dekhtā huuñ kahāñ kā maiñ sirf tū hī tū hai

chaman kī saarī bahār tujh se guloñ kā saarā nikhār tujh se

tirī adāoñ kī fitna-parvar kisī meñ ḳhū hai kisī meñ bū hai

kisī ne dāman meñ le liye haiñ Dhale hue āñso.oñ ke motī

jo merī āñkhoñ se gir chuke haiñ abhī tak un kī ye aabrū hai

zamāna karvaT badal rahā hai na.ī-na.ī chaal chal rahā hai

sahar na ho jaaye zindagī kī agar yahī shām-e-ārzū hai

vo baḳhsh de mujh ko yā na baḳhshe maiñ us kā banda vo merā maulā

maiñ is masarrat se mutma.in huuñ ki us se ik roz dū-ba-dū hai

hamārā jī bār-bār tum par darūd paḌhne ko chāhtā hai

ki ruḳh jo vashshams hū-bahū hai to zulf vallail mū-ba-mū hai

tumhāre hāthoñ pe bik chuke haiñ tumhārī chaukhaT pe Tik chuke haiñ

tumhārī nisbat se hai ye sāhib hamārī jo kuchh bhī aabrū hai

bitā.ūñ kyā hai ye kyā tamāshā firāq kaisā visāl kis kā

jo saath har-dam hai mere 'kāmil' usī se milne kī aarzū hai

junun mein jo kuchh main kah raha hun maqam-e-hairat ki guftugu hai

KHabar nahin kis ko dekhta hun pata nahin kaun ru-ba-ru hai

ye KHud bhi ek tafarqe hai kahna jo tu hai main hun jo main hun tu hai

tere siwa dusra nahin hai ki tu hi KHud tere ru-ba-ru hai

khuli jo mujh par meri haqiqat to sab izafi thi meri nisbat

jab un nigahon se dekhta hun kahan ka main sirf tu hi tu hai

chaman ki sari bahaar tujh se gulon ka sara nikhaar tujh se

teri adaon ki fitna-parwar kisi mein KHu hai kisi mein bu hai

kisi ne daman mein le liye hain Dhale hue aansoon ke moti

jo meri aankhon se gir chuke hain abhi tak un ki ye aabru hai

zamana karwaT badal raha hai nai-nai chaal chal raha hai

sahar na ho jaye zindagi ki agar yahi sham-e-arzu hai

wo baKHsh de mujh ko ya na baKHshe main us ka banda wo mera maula

main is masarrat se mutmain hun ki us se ek roz du-ba-du hai

hamara ji bar-bar tum par darud paDhne ko chahta hai

ki ruKH jo washshams hu-bahu hai to zulf wallail mu-ba-mu hai

tumhaare hathon pe bik chuke hain tumhaari chaukhaT pe Tik chuke hain

tumhaari nisbat se hai ye sahib hamari jo kuchh bhi aabru hai

bitaun kya hai ye kya tamasha firaq kaisa visal kis ka

jo sath har-dam hai mere 'kaamil' usi se milne ki aarzu hai