mujhe de rahe hain taskin wo mazaq-e-gham badal kar

mujhe de rahe haiñ taskīñ vo mazāq-e-ġham badal kar

nikal aa.ī dil kī hasrat mere āñsuoñ meñ Dhal kar

adab ai junūn-e-ulfat ye maqām-e-bandagī hai

tirā jo qadam bhī uThe vo uThe zarā sambhal kar

ye banī ajiib kuchh shai mere ishq kī badaulat

tire husn kī ḳhudā.ī mirī bandagī meñ Dhal kar

faqat ārzū-e-dil par hai madār-e-zindagānī

mujhe be-mazā na kar de koī aarzū nikal kar

dayār se uThā huuñ na uThūñgā tā-qiyāmat

ki yahīñ sukūñ milā hai mere dil ko ab to chal kar

kabhī kuchh nazar hai un kī kabhī kuchh nazar hai in kī

vo pilā.e jā rahe haiñ mujhe mai badal badal kar

rahūñ be-niyāz maqsad tirī banda-parvarī se

kahīñ lab tak aa na jaaye koī mudda.ā machal kar

koī ham se baḌh ke saaqī nahīñ mustahiq karam kā

ki mile haiñ mai-kashoñ meñ tire mai-kade meñ pal kar

vo ġhurūr-e-husn-e-kHud-sar-o-sar-e-niyāz 'kāmil'

koī muskurā rahā hai mirī zindagī badal kar

mujhe de rahe hain taskin wo mazaq-e-gham badal kar

nikal aai dil ki hasrat mere aansuon mein Dhal kar

adab ai junun-e-ulfat ye maqam-e-bandagi hai

tera jo qadam bhi uThe wo uThe zara sambhal kar

ye bani ajib kuchh shai mere ishq ki badaulat

tere husn ki KHudai meri bandagi mein Dhal kar

faqat aarzu-e-dil par hai madar-e-zindagani

mujhe be-maza na kar de koi aarzu nikal kar

dayar se uTha hun na uThunga ta-qiyamat

ki yahin sukun mila hai mere dil ko ab to chal kar

kabhi kuchh nazar hai un ki kabhi kuchh nazar hai in ki

wo pilae ja rahe hain mujhe mai badal badal kar

rahun be-niyaz maqsad teri banda-parwari se

kahin lab tak aa na jaye koi muddaa machal kar

koi hum se baDh ke saqi nahin mustahiq karam ka

ki mile hain mai-kashon mein tere mai-kade mein pal kar

wo ghurur-e-husn-e-kHud-sar-o-sar-e-niyaz 'kaamil'

koi muskura raha hai meri zindagi badal kar