tum hi to wajh-e-zindagi tum hi to maqsad-e-hayat

tum hī to vaj.h-e-zindagī tum hī to maqsad-e-hayāt

jān-e-jahān-e-ārzū rūh-e-ravān-e-kā.enāt

bhuul bhī jā.iye kahīñ saarī izāfatoñ kī baat

vahm-e-dui bhī kufr hai ek vajūd ek zaat

partav-e-husn-e-yār huuñ zaat jahāñ sifat vahāñ

jaane kahāñ kahāñ mujhe DhūñDh rahī hai kā.enāt

kyā kahūñ kitnī shoḳh thī un kī adā-e-jalva bhī

ek jhalak meñ uḌ gayā rañg-e-ruḳh-e-ta.ayyunāt

haaye vo zulf-e-ambarīñ aur vo chashm-e-surmagīñ

aaj tak us kī yaad meñ jhuum rahī hai kā.enāt

nāz-o-ġhurūr-e-husn udhar aur sar-e-niyāz idhar

kaash mile nasīb se phir koī aisī ek rut

ishq meñ jān-o-dil hī kyā diin gayā dharm gayā

ek nigāh-e-nāz meñ luT ga.ī saarī kā.enāt

kis ke liye jahāñ meñ itnā sab ehtimām hai

kis kī taraf mushīr haiñ saare mazāhir-e-sifāt

'kāmil’-e-kHasta-hāl par tum ne jo muskurā diyā

ik dil-e-mustamand ko bañdh ga.iiñ kuchh tavaqquāt

tum hi to wajh-e-zindagi tum hi to maqsad-e-hayat

jaan-e-jahan-e-arzu ruh-e-rawan-e-kaenat

bhul bhi jaiye kahin sari izafaton ki baat

wahm-e-dui bhi kufr hai ek wajud ek zat

partaw-e-husn-e-yar hun zat jahan sifat wahan

jaane kahan kahan mujhe DhunDh rahi hai kaenat

kya kahun kitni shoKH thi un ki ada-e-jalwa bhi

ek jhalak mein uD gaya rang-e-ruKH-e-tayyunat

haye wo zulf-e-ambarin aur wo chashm-e-surmagin

aaj tak us ki yaad mein jhum rahi hai kaenat

naz-o-ghurur-e-husn udhar aur sar-e-niyaz idhar

kash mile nasib se phir koi aisi ek rut

ishq mein jaan-o-dil hi kya din gaya dharm gaya

ek nigah-e-naz mein luT gai sari kaenat

kis ke liye jahan mein itna sab ehtimam hai

kis ki taraf mushir hain sare mazahir-e-sifat

'kaamil’-e-kHasta-haal par tum ne jo muskura diya

ek dil-e-mustamand ko bandh gain kuchh tawaqquat