bhik de jaiye apne didar ki marne wale ka arman nikal jaega

bhiik de jā.iye apne dīdār kī marne vaale kā armāñ nikal jā.egā

log kahte haiñ bīmār-e-ġham aap kā aap aa jā.eñge to sambhal jā.egā

haath meñ haath lenā kuchh āsāñ nahīñ baat rakhnī paḌegī merī har jagah

faisla merī qismat kā hogā vahī jo tumhārī zabāñ se nikal jā.egā

roz-e-avval se mujh ko ye īqān hai aur is baat par merā īmān hai

girte girte bhī jis ne pukārā tujhe dast-gīrī se terī sambhal jā.egā

aag terī mohabbat kī ai jān-e-jāñ jis ke dil ko lagī us ke dil ko lagī

us ke sho’loñ se kyā bach sakegā koī sañg-dil bhī agar ho pighal jā.egā

huuñ azal se tumhāre hī dar kā gadā aas merī tum hī se rahī hai sadā

kyā burā hai agar ik nazar dekh lo āġhosh-e-rahmat meñ pal jā.egā

nā samajh ḳhud tirī 'aql kā pher hai kaam lenā na aane se andher hai

un ko āvāz dene kī bas der hai ḳhud-baḳhud saarā naqsha badal jā.egā

kaash aa jaa.e jaldī vo din vo ghaḌī āstāna nabī ho jabīñ ho merī

laaj phir mere sajdoñ kī ho yā na ho lekin armān-e-dil to nikal jā.egā

roz-e-mahshar sañvar kar vo jab ā.eñge un ke kushte phir un par mire jā.eñge

muñh hī takte raheñge sab ahl-e-nazar un kā jaadū vahāñ bhī to chal jā.egā

fikr-e-duniyā 'abas fikr-e-'uqbā 'abas ham se baḌh kar hamārī unheñ fikr hai

vaqt kaisā hī 'kāmil' kaThin kyuuñ na ho un kī chashm-e-'ināyat se Tal jā.egā

bhik de jaiye apne didar ki marne wale ka arman nikal jaega

log kahte hain bimar-e-gham aap ka aap aa jaenge to sambhal jaega

hath mein hath lena kuchh aasan nahin baat rakhni paDegi meri har jagah

faisla meri qismat ka hoga wahi jo tumhaari zaban se nikal jaega

roz-e-awwal se mujh ko ye iqan hai aur is baat par mera iman hai

girte girte bhi jis ne pukara tujhe dast-giri se teri sambhal jaega

aag teri mohabbat ki ai jaan-e-jaan jis ke dil ko lagi us ke dil ko lagi

us ke sho’lon se kya bach sakega koi sang-dil bhi agar ho pighal jaega

hun azal se tumhaare hi dar ka gada aas meri tum hi se rahi hai sada

kya bura hai agar ek nazar dekh lo aaghosh-e-rahmat mein pal jaega

na samajh KHud teri 'aql ka pher hai kaam lena na aane se andher hai

un ko aawaz dene ki bas der hai KHud-baKHud sara naqsha badal jaega

kash aa jae jaldi wo din wo ghaDi aastana nabi ho jabin ho meri

laj phir mere sajdon ki ho ya na ho lekin arman-e-dil to nikal jaega

roz-e-mahshar sanwar kar wo jab aaenge un ke kushte phir un par mere jaenge

munh hi takte rahenge sab ahl-e-nazar un ka jadu wahan bhi to chal jaega

fikr-e-duniya 'abas fikr-e-'uqba 'abas hum se baDh kar hamari unhen fikr hai

waqt kaisa hi 'kaamil' kaThin kyun na ho un ki chashm-e-'inayat se Tal jaega