بھیک دے جائیے اپنے دیدار کی مرنے والے کا ارماں نکل جائے گا

بھیک دے جائیے اپنے دیدار کی مرنے والے کا ارماں نکل جائے گا

لوگ کہتے ہیں بیمارِ غم آپ کا آپ آ جائیں گے تو سنبھل جائے گا

ہاتھ میں ہاتھ لینا کچھ آساں نہیں بات رکھنی پڑے گی میری ہر جگہ

فیصلہ میری قسمت کا ہوگا وہی جو تمہاری زباں سے نکل جائے گا

روز اول سے مجھ کو یہ ایقان ہے اور اس بات پر میرا ایمان ہے

گرتے گرتے بھی جس نے پکارا تجھے دستگیری سے تری سنبھل جائے گا

آگ تری محبت کی اے جانِ جاں جس کے دل کو لگی اس کے دل کو لگی

اس کے شعلوں سے کیا بچ سکے گا کوئی سنگ دل بھی اگر ہو پگھل جائے گا

ہوں ازل سے تمہارے ہی در کا گدا آس میری تم ہی سے رہی ہے سدا

کیا برا ہے اگر اک نظر دیکھ لو آغو ش رحمت میں پل جائے گا

نا سمجھ خود تری عقل کا پھیر ہے کام لینا نہ آنے سے اندھیر ہے

ان کو آواز دینے کی بس دیر ہے خود بخود سارا نقشہ بدل جائے گا

کاش آ جائے جلدی وہ دن وہ گھڑی آستانہ نبی ہو جبیں ہو میری

لاج پھر میرے سجدوں کی ہو یا نہ ہو لیکن ارمانِ دل تو نکل جائے گا

روزِ محشر سنور کر وہ جب آئیں گے ان کے کشتے پھر ان پر مرے جائیں گے

منہ ہی تکتے رہیں گے سب اہلِ نظر ان کا جادو وہاں بھی تو چل جائے گا

فکر دنیا عبث فکر عقبیٰ عبث ہم سے بڑھ کر ہماری انہیں فکر ہے

وقت کیسا ہی کاملؔ کٹھن کیوں نہ ہو ان کی چشمِ عنایت سے ٹل جائے گا