karen hum kis ki puja aur chaDhaen kis ko chandan hum

kareñ ham kis kī puujā aur chaḌhā.eñ kis ko chandan ham

sanam ham dair ham but-ḳhāna ham but ham barahman ham

dar-o-dīvār hī nazroñ meñ apnī ā.īna-ḳhāna

kiyā karte haiñ ghar baiThe hī apnā aap darshan ham

mohabbat hai to apne se 'adāvat hai to apne se

haiñ aap hī dost apne ham haiñ aap hī apne dushman ham

kab uThte haiñ uThā.e se kisī shaiḳh-o-barhaman ke

dar-e-dil par hī apne maar kar baiThe haiñ aasan ham

jise ġhaib aap samjhe haiñ shahādat jis ko jaane haiñ

banā rakkhe haiñ apnī dil-lagī ke ye ghar āñgan ham

hidāyat ham se hī paidā zalālat ham pe hī shaidā

kabhī haiñ rahnumā apne kabhī haiñ apne rahzan ham

na qīl-o-qāl se matlab na shuġhl-ashġhāl se matlab

murāqib apne rahte haiñ jhukā kar apnī gardan ham

rahā karte haiñ pahroñ mahv-e-nazzāra meñ ham apne

sarāpā ho rahe haiñ ab to apne aap darpan ham

huā ai 'faiz' mā'lūm ek muddat meñ hamīñ the vo

japā karte the jis ke naam kī din-rāt sumiran ham

karen hum kis ki puja aur chaDhaen kis ko chandan hum

sanam hum dair hum but-KHana hum but hum barahman hum

dar-o-diwar hi nazron mein apni aaina-KHana

kiya karte hain ghar baiThe hi apna aap darshan hum

mohabbat hai to apne se 'adawat hai to apne se

hain aap hi dost apne hum hain aap hi apne dushman hum

kab uThte hain uThae se kisi shaiKH-o-barhaman ke

dar-e-dil par hi apne mar kar baiThe hain aasan hum

jise ghaib aap samjhe hain shahadat jis ko jaane hain

bana rakkhe hain apni dil-lagi ke ye ghar aangan hum

hidayat hum se hi paida zalalat hum pe hi shaida

kabhi hain rahnuma apne kabhi hain apne rahzan hum

na qil-o-qal se matlab na shughl-ashghaal se matlab

muraqib apne rahte hain jhuka kar apni gardan hum

raha karte hain pahron mahw-e-nazzara mein hum apne

sarapa ho rahe hain ab to apne aap darpan hum

hua ai 'faiz' ma'lum ek muddat mein hamin the wo

japa karte the jis ke nam ki din-raat sumiran hum