کریں ہم کس کی پوجا اور چڑھائیں کس کو چندن ہم

کریں ہم کس کی پوجا اور چڑھائیں کس کو چندن ہم

صنم ہم دیر ہم بت خانہ ہم بت ہم برہمن ہم

در و دیوار ہی نظروں میں اپنی آئینہ خانہ

کیا کرتے ہیں گھر بیٹھے ہی اپنا آپ درشن ہم

محبت ہے تو اپنے سے عداوت ہے تو اپنے سے

ہیں آپ ہی دوست اپنے ہم ہیں آپ ہی اپنے دشمن ہم

کب اٹھتے ہیں اٹھائے سے کسی شیخ و برہمن کے

در دل پر ہی اپنے مار کر بیٹھے ہیں آسن ہم

جسے غیب آپ سمجھے ہیں شہادت جس کو جانے ہیں

بنا رکھے ہیں اپنی دل لگی کے یہ گھر آنگن ہم

ہدایت ہم سے ہی پیدا ضلالت ہم پہ ہی شیدا

کبھی ہیں رہنما اپنے کبھی ہیں اپنے رہزن ہم

نہ قیل و قال سے مطلب نہ شغل اشغال سے مطلب

مراقب اپنے رہتے ہیں جھکا کر اپنی گردن ہم

رہا کرتے ہیں پہروں محو نظارہ میں ہم اپنے

سراپا ہو رہے ہیں اب تو اپنے آپ درپن ہم

ہوا اے فیضؔ معلوم ایک مدت میں ہمیں تھے وہ

جپا کرتے تھے جس کے نام کی دن رات سمرن ہم