chaunk uTha ghabra ke zamana dhum machai logon ne

chauñk uThā ghabrā ke zamāna dhuum machā.ī logoñ ne

jab bhī merī sūrat se tasvīr milā.ī logoñ ne

koī na samjhā dard ko mere merī kisī ne baat na kī

merī kahānī apnī kah kar bas dohrā.ī logoñ ne

'ishq ko bhī mujrim gardānā husn ko bhī badnām kiyā

aag lagāne ko to yuuñ bhī aag lagā.ī logoñ ne

kyā kyā mujh par zulm na Dhaa.e kyā kyā mujh ko ġham na diye

dekh ke un kī mahfil-e-dil tak apnī rasā.ī logoñ ne

'ishq meñ jo manzil miltī hai yuuñ hī nahīñ miltī 'kausar'

barsoñ vīrānoñ ke saroñ par ḳhaak uḌaa.ī logoñ ne

chaunk uTha ghabra ke zamana dhum machai logon ne

jab bhi meri surat se taswir milai logon ne

koi na samjha dard ko mere meri kisi ne baat na ki

meri kahani apni kah kar bas dohrai logon ne

'ishq ko bhi mujrim gardana husn ko bhi badnam kiya

aag lagane ko to yun bhi aag lagai logon ne

kya kya mujh par zulm na Dhae kya kya mujh ko gham na diye

dekh ke un ki mahfil-e-dil tak apni rasai logon ne

'ishq mein jo manzil milti hai yun hi nahin milti 'kausar'

barson viranon ke saron par KHak uDai logon ne