nazron se pi raha hun main mai-KHana ja ke kya karun

nazroñ se pī rahā huuñ maiñ mai-ḳhāna jā ke kyā karūñ

mastī hai vo rū-ba-rū hosh meñ aa ke kyā karūñ

aisī pilā.ī yaar ne mujh ko sharāb-e-mā'rifat

un kā sarāpā ban gayā apne ko pā ke kyā karūñ

un se visāl hote hī me'arāj ho ga.ī mirī

'arsh hī farsh ban gayā 'arsh pe jā ke kyā karūñ

duniyā badal ga.ī mirī duniyā banā ke kyā karūñ

sāmne hai vo rū-ba-rū kā'ba ko jā ke kyā karūñ

mahv-e-jamāl-e-yār huuñ ġharq-e-visāl-e-yār huuñ

nazreñ kuchh aisī laḌ ga.ī nazreñ bachā ke kyā karūñ

baḳhshish aisī hai mirī us se merī najāt hai

dekh ke naqsh-e-pā-e-yār sar na jhukā ke kyā karūñ

ḳhidmat-e-yār-e-zindagī nisbat-e-yār-e-bandagī

us se ziyāda aur kuchh kahe ki sunā ke kyā karūñ

chashm-e-haqīqat-e-āshnā mahbūb-e-dīd hai mirī

parde meñ hai vo jalva-gar parde banā ke kyā karūñ

apne meñ us ko pā liyā jis kī talāsh thī mujhe

dair-o-haram se kaam kyā kā'ba ko jā ke kyā karūñ

naam hai 'ḳhālid' aap kā lekin haqīqat aur hai

haq hai numāyāñ aap se ġhair ko pā ke kyā karūñ

nazron se pi raha hun main mai-KHana ja ke kya karun

masti hai wo ru-ba-ru hosh mein aa ke kya karun

aisi pilai yar ne mujh ko sharab-e-ma'rifat

un ka sarapa ban gaya apne ko pa ke kya karun

un se visal hote hi me'araj ho gai meri

'arsh hi farsh ban gaya 'arsh pe ja ke kya karun

duniya badal gai meri duniya bana ke kya karun

samne hai wo ru-ba-ru ka'ba ko ja ke kya karun

mahw-e-jamal-e-yar hun gharq-e-visal-e-yar hun

nazren kuchh aisi laD gai nazren bacha ke kya karun

baKHshish aisi hai meri us se meri najat hai

dekh ke naqsh-e-pa-e-yar sar na jhuka ke kya karun

KHidmat-e-yar-e-zindagi nisbat-e-yar-e-bandagi

us se ziyaada aur kuchh kahe ki suna ke kya karun

chashm-e-haqiqat-e-ashna mahbub-e-did hai meri

parde mein hai wo jalwa-gar parde bana ke kya karun

apne mein us ko pa liya jis ki talash thi mujhe

dair-o-haram se kaam kya ka'ba ko ja ke kya karun

nam hai 'KHalid' aap ka lekin haqiqat aur hai

haq hai numayan aap se ghair ko pa ke kya karun