نیست سے پہلے ہوا جو نیست ہستی ہے یہی

نیست سے پہلے ہوا جو نیست ہستی ہے یہی

پھنس گیا گر دام ہستی میں تو پستی ہے یہی

اپنی صورت کو مٹا کر صورتِ معنی کو دیکھ

حق پژوہی ہے یہی اور حق پرستی ہے یہی

ہستیٔ مطلق یہی ہے یہ جو ہستی ہے تری

ہو گیا جب تو فنا تب عین ہستی ہے یہی

توڑ کر اس ساغر ہستی کو پی صہبائے عشق

مشرِب پیرِ مغاں میں عین مستی ہے یہی

نیست ہو کر کیوں نہ کھا پاؤں راہ عشق میں

نیستی ہستی پہ سالک کی برستی ہے یہی

ہستیٔ موجود کے باعث ہوئے محبوب ہم

فی الحقیقت جان لے رازِ الستی ہے یہی

ذات واجب اور غیب محض کے مظہر ہیں ہم

ڈھونڈھتے اسکو کہاں ہو اسکی بستی ہے یہی

منہدم کر اے خلیلؔ اپنی خودی کا بت کدہ

بُت شکستن کا کمالِ تیز دستی ہے یہی