hui husn-o-ishq mein jab ba-ham uns-o-ashnai

huī husn-o-'ishq meñ jab ba-ham uns-o-āshnā.ī

kahā jab kisī ne majnūñ vahīñ lailā yaad aa.ī

rahā bahr-e-ġham meñ Duubā vale tah ko ab maiñ pahuñchā

ki ġharīq-e-'ishq ho kar huī haq se āshnā.ī

vahī zaat jalva-gar hai merī jis taraf nazar hai

nazar aatā sar-basar hai vahīñ jalva-e-ḳhudā.ī

huā but-kada meñ sākin rahā kā'ba meñ bhī lekin

vahī ek sham' raushan mujhe dono jaa.e paa.ī

maiñ huuñ maz.har-e-do-'ālam maiñ huuñ sirr-e-ism-e-ā'zam

maiñ huuñ jalva-gāh is dam bi-libās-e-fī-fanā.ī

isī tarh 'āshiqoñ ko tu milā ke Thokaroñ meñ

kare sarfarāz pyāre terī chaal maiñ ne paa.ī

ye 'ḳhalīl' mast-e-mutlaq hai fanā-e-zāt-e-hū haq

kahe phir agar anal-haq to ḳhudī kahāñ miTā.ī

hui husn-o-'ishq mein jab ba-ham uns-o-ashnai

kaha jab kisi ne majnun wahin laila yaad aai

raha bahr-e-gham mein Duba wale tah ko ab main pahuncha

ki ghariq-e-'ishq ho kar hui haq se aashnai

wahi zat jalwa-gar hai meri jis taraf nazar hai

nazar aata sar-basar hai wahin jalwa-e-KHudai

hua but-kada mein sakin raha ka'ba mein bhi lekin

wahi ek sham' raushan mujhe dono jae pai

main hun mazhar-e-do-'alam main hun sirr-e-ism-e-a'zam

main hun jalwa-gah is dam bi-libas-e-fi-fanai

isi tarh 'ashiqon ko tu mila ke Thokaron mein

kare sarfaraaz pyare teri chaal main ne pai

ye 'KHalil' mast-e-mutlaq hai fana-e-zat-e-hu haq

kahe phir agar anal-haq to KHudi kahan miTai