KHirad-mandon ko diwana banaya

ḳhirad-mandoñ ko dīvāna banāyā

jahāñ ko ik parī-ḳhāna banāyā

jise dekhā yahāñ hairān dekhā

ye kaisā ā.īna-ḳhāna banāyā

kiyā hushiyār jitnoñ ko bigāḌā

banāyā jis ko dīvāna banāyā

pilā.e ḳhum pe ḳhum ehsān dekho

mujhe saaqī ne ḳhum-ḳhāna banāyā

pas-e-murdan bhī huuñ mamnūn saaqī

merī miTTī se paimāna banāyā

ḳharābī dil kī kyā-kyā ishq ne kī

bharī bastī ko vīrāna banāyā

banāyā aap ne jis ko yagāna

use apnoñ ne be-gāna banāyā

banāyā dil ko gar kHalvat-gah-e-nāz

to āñkhoñ ko jalva-ḳhana banāyā

bachā soz-e-mohabbat se na koī

samundar ko bhī parvāna banāyā

hai sannā'-e-azal kā faiz 'alvī'

tirā mashrab jo rindāna banāyā

KHirad-mandon ko diwana banaya

jahan ko ek pari-KHana banaya

jise dekha yahan hairan dekha

ye kaisa aaina-KHana banaya

kiya hushiyar jitnon ko bigaDa

banaya jis ko diwana banaya

pilae KHum pe KHum ehsan dekho

mujhe saqi ne KHum-KHana banaya

pas-e-murdan bhi hun mamnun saqi

meri miTTi se paimana banaya

KHarabi dil ki kya-kya ishq ne ki

bhari basti ko virana banaya

banaya aap ne jis ko yagana

use apnon ne be-gana banaya

banaya dil ko gar kHalwat-gah-e-naz

to aankhon ko jalwa-KHana banaya

bacha soz-e-mohabbat se na koi

samundar ko bhi parwana banaya

hai sanna'-e-azal ka faiz 'alwi'

tera mashrab jo rindana banaya