haal mein apne mast hun ghair ka hosh hi nahin

haal meñ apne mast huuñ ġhair kā hosh hī nahīñ

rahtā huuñ maiñ jahāñ meñ yuuñ jaise yañh koī nahīñ

koī mazā mazā nahīñ koī hañsī hañsī nahīñ

tere baġhair zindagī maut hai zindagī nahīñ

is dil-e-zār se mafar 'ishq meñ jiite jī nahīñ

ronā hai mujh ko 'umr-bhar ġham mirā ’ārzī nahīñ

pīr-e-muġhāñ kā dam kahāñ us kī vo bazm-e-jam kahāñ

baada nahīñ to ham kahāñ ziist ye ziist hī nahīñ

jaa.eñ ba-chashm-e-nam kahāñ ro.eñ ab apnā ġham kahāñ

pahle se ab karam kahāñ aisā to ab koī nahīñ

hijr kī shab 'ajab hai shab-e-hāl ye kyā hai lil'ajab

taare haiñ raushnī nahīñ chāñd hai chāñdnī nahīñ

shīsha hai jaam hai na ḳhum asal to raunaqeñ haiñ gum

laakh sajā rahe ho tum bazm abhī sajī nahīñ

kitnā hī tū baḌā sahī ye bhī hai zāhid āgahī

samjhe jo ḳhud ko muntahī vo abhī mubtadī nahīñ

husn kī bārgāh hai sahal koī nibāh hai

aah bhī ik gunāh hai 'ishq bhī dil-lagī nahīñ

baiThā huuñ maiñ jhukā.e sar nīchī kiye hue nazar

bazm meñ sab sahī magar vo jo nahīñ koī nahīñ

un kī mohabbat-e-āh meñ shauq-bharī nigāh meñ

ya.anī abhī hai raah meñ dil meñ abhī basī nahīñ

ai mire bāġh-e-ārzū kaisā hai bāġh-hā-e-tū

kaliyāñ to go haiñ chaar sū koī kalī khilī nahīñ

dil meñ lagā ke un kī lau kar de jahāñ meñ nashr-e-zau

sham.eñ to jal rahī haiñ sau bazm meñ raushnī nahīñ

haal mein apne mast hun ghair ka hosh hi nahin

rahta hun main jahan mein yun jaise yanh koi nahin

koi maza maza nahin koi hansi hansi nahin

tere baghair zindagi maut hai zindagi nahin

is dil-e-zar se mafar 'ishq mein jite ji nahin

rona hai mujh ko 'umr-bhar gham mera ’arzi nahin

pir-e-mughan ka dam kahan us ki wo bazm-e-jam kahan

baada nahin to hum kahan zist ye zist hi nahin

jaen ba-chashm-e-nam kahan roen ab apna gham kahan

pahle se ab karam kahan aisa to ab koi nahin

hijr ki shab 'ajab hai shab-e-haal ye kya hai lil'ajab

tare hain raushni nahin chand hai chandni nahin

shisha hai jam hai na KHum asal to raunaqen hain gum

lakh saja rahe ho tum bazm abhi saji nahin

kitna hi tu baDa sahi ye bhi hai zahid aagahi

samjhe jo KHud ko muntahi wo abhi mubtadi nahin

husn ki bargah hai sahal koi nibah hai

aah bhi ek gunah hai 'ishq bhi dil-lagi nahin

baiTha hun main jhukae sar nichi kiye hue nazar

bazm mein sab sahi magar wo jo nahin koi nahin

un ki mohabbat-e-ah mein shauq-bhari nigah mein

yani abhi hai rah mein dil mein abhi basi nahin

ai mere bagh-e-arzu kaisa hai bagh-ha-e-tu

kaliyan to go hain chaar su koi kali khili nahin

dil mein laga ke un ki lau kar de jahan mein nashr-e-zau

shamen to jal rahi hain sau bazm mein raushni nahin