na dekhunga hasinon ko are tauba na dekhunga

na dekhūñgā hasīnoñ ko are tauba na dekhūñgā

taqāza laakh tū kar ai dil-e-shaidā na dekhūñgā

karūñ nāseh maiñ kyuuñ kar haa.e ye va'ada na dekhūñgā

nazar paḌ jā.egī ḳhud hī jo dānista na dekhūñgā

nigāh-e-nāz ko terī meñ sharminda na dekhūñgā

haTā.e letā huuñ apnī nazar achchhā na dekhūñgā

vo kahte haiñ na samjhūñgā tujhe 'majzūb' maiñ 'āshiq

ki jab tak kūcha-o-bāzār meñ rusvā na dekhūñgā

balā se maiñ agar ro ro ke bīnā.ī bhī kho baiThoñ

karūñgā kyā in āñkhoñ ko jo vo jalvā na dekhūñgā

uThā.ūñgā na zaanū se maiñ hargiz apnā sar hamdam

are maiñ apnī āñkhoñ se unheñ jaatā na dekhūñgā

zarā ai nāseh-e-farzāna chal kar sun to do bāteñ

na hogā phir bhī tū 'majzūb' kā dīvāna dekhūñgā

na dekhunga hasinon ko are tauba na dekhunga

taqaza lakh tu kar ai dil-e-shaida na dekhunga

karun naseh main kyun kar hae ye wa'ada na dekhunga

nazar paD jaegi KHud hi jo danista na dekhunga

nigah-e-naz ko teri mein sharminda na dekhunga

haTae leta hun apni nazar achchha na dekhunga

wo kahte hain na samjhunga tujhe 'majzub' main 'ashiq

ki jab tak kucha-o-bazar mein ruswa na dekhunga

bala se main agar ro ro ke binai bhi kho baiThon

karunga kya in aankhon ko jo wo jalwa na dekhunga

uThaunga na zanu se main hargiz apna sar hamdam

are main apni aankhon se unhen jata na dekhunga

zara ai naseh-e-farzana chal kar sun to do baaten

na hoga phir bhi tu 'majzub' ka diwana dekhunga