نہ دیکھوں گا حسینوں کو ارے توبہ نہ دیکھوں گا

نہ دیکھوں گا حسینوں کو ارے توبہ نہ دیکھوں گا

تقاضہ لاکھ تو کر اے دل شیدا نہ دیکھوں گا

کروں ناصح میں کیوں کر ہائے یہ وعدہ نہ دیکھوں گا

نظر پڑ جائے گی خود ہی جو دانستہ نہ دیکھوں گا

نگاہ ناز کو تیری میں شرمندہ نہ دیکھوں گا

ہٹائے لیتا ہوں اپنی نظر اچھا نہ دیکھوں گا

وہ کہتے ہیں نہ سمجھوں گا تجھے مجذوبؔ میں عاشق

کہ جب تک کوچہ و بازار میں رسوا نہ دیکھوں گا

بلا سے میں اگر رو رو کے بینائی بھی کھو بیٹھوں

کروں گا کیا ان آنکھوں کو جو وہ جلوا نہ دیکھوں گا

اٹھاؤں گا نہ زانو سے میں ہرگز اپنا سر ہمدم

ارے میں اپنی آنکھوں سے انہیں جاتا نہ دیکھوں گا

ذرا اے ناصح فرزانہ چل کر سن تو دو باتیں

نہ ہوگا پھر بھی تو مجذوبؔ کا دیوانہ دیکھوں گا