wo haq ke sath rabita-e-dil nahin raha

vo haq ke saath rābita-e-dil nahīñ rahā

majzūb us laqab hī ke qābil nahīñ rahā

vo aañkh ab nahīñ hai vo ab dil nahīñ rahā

'majzūb' muñh dikhāne ke qābil nahīñ rahā

nā-guftanī hai haal mirā kuchh na pochhiye

kahne ke aur sunñe ke qābil nahīñ rahā

vo aañkh jo na ġhair ko dekhe nahīñ rahī

vo dil jo ho na ġhair pe maa.il nahīñ rahā

maiñ laakh tauba karatā huuñ nibhtī nahīñ kabhī

ab apne 'azm kā to maiñ qaa.il nahīñ rahā

us ke sivā ki aap hī merī madad kareñ

kuchh chāra mere murshid-e-kāmil nahīñ rahā

tārāj kar liyā mujhe shaitān-o-nafs ne

jo kuchh kiyā thā aap se hāsil nahīñ rahā

vo haal ho gayā hai ki goyā kabhī bhī maiñ

ḳhuddām meñ huzūr ke dāḳhil nahīñ rahā

nā-chār bahr-e-chāra chalā aayā sar-nigūñ

varna maiñ muñh dikhāne ke qābil nahīñ rahā

ab rāt-din hai zikr butāñ aur shuġhl-e-'ishq

allāh kā maiñ zākir-o-shāġhil nahīñ rahā

pahlū meñ mere vo dil-e-nāpāk hai huzūr

maiñ paas baiThne ke bhī qābil nahīñ rahā

qaabū meñ mere ab mirī āñkheñ nahīñ rahīñ

kahne meñ mere ab ye mirā dil nahīñ rahā

dast-e-karam ho jānib-e-'majzūb' phir darāz

mahrūm aap kā kabhī saa.el nahīñ rahā

wo haq ke sath rabita-e-dil nahin raha

majzub us laqab hi ke qabil nahin raha

wo aankh ab nahin hai wo ab dil nahin raha

'majzub' munh dikhane ke qabil nahin raha

na-guftani hai haal mera kuchh na pochhiye

kahne ke aur sunne ke qabil nahin raha

wo aankh jo na ghair ko dekhe nahin rahi

wo dil jo ho na ghair pe mail nahin raha

main lakh tauba karata hun nibhti nahin kabhi

ab apne 'azm ka to main qail nahin raha

us ke siwa ki aap hi meri madad karen

kuchh chaara mere murshid-e-kaamil nahin raha

taraj kar liya mujhe shaitan-o-nafs ne

jo kuchh kiya tha aap se hasil nahin raha

wo haal ho gaya hai ki goya kabhi bhi main

KHuddam mein huzur ke daKHil nahin raha

na-chaar bahr-e-chaara chala aaya sar-nigun

warna main munh dikhane ke qabil nahin raha

ab raat-din hai zikr butan aur shughl-e-'ishq

allah ka main zakir-o-shaghil nahin raha

pahlu mein mere wo dil-e-napak hai huzur

main pas baiThne ke bhi qabil nahin raha

qabu mein mere ab meri aankhen nahin rahin

kahne mein mere ab ye mera dil nahin raha

dast-e-karam ho jaanib-e-'majzub' phir daraaz

mahrum aap ka kabhi sael nahin raha