ajab kya gar mujhe aalam ba-in wusat bhi zindan tha

'ajab kyā gar mujhe 'ālam bā-īñ vus'at bhī zindāñ thā

maiñ vahshī bhī to vo huuñ lā-makāñ jis kā bayābāñ thā

kisī kī yaad meñ baiThe jo sab se be-ġharaz ho kar

to apnā boriyā bhī phir hameñ taḳht-e-sulaimāñ thā

zarā dekho to ye ulTī rasā.ī merī qismat kī

vo niklā ġhair ke dil se jo mere dil kā armāñ thā

hañse bhī ham to misl-e-barq vo hañsnā hañse ai dil

ki jis hañsne meñ duniyā bhar kā ronā haaye pinhāñ thā

jo ruḳh badlā hai saaqī ne digar-gūñ rañg-e-mahfil hai

vo ḳhandāñ hai jo giryāñ thā vo giryāñ hai jo ḳhandāñ thā

bhalā 'majzūb' kuchh to hosh rakhte aise mauqa’ par

ġhazab hai mezbāñ banñā paḌā us ko jo mehmāñ thā

'ajab kya gar mujhe 'alam ba-in wus'at bhi zindan tha

main wahshi bhi to wo hun la-makan jis ka bayaban tha

kisi ki yaad mein baiThe jo sab se be-gharaz ho kar

to apna boriya bhi phir hamein taKHt-e-sulaiman tha

zara dekho to ye ulTi rasai meri qismat ki

wo nikla ghair ke dil se jo mere dil ka arman tha

hanse bhi hum to misl-e-barq wo hansna hanse ai dil

ki jis hansne mein duniya bhar ka rona haye pinhan tha

jo ruKH badla hai saqi ne digar-gun rang-e-mahfil hai

wo KHandan hai jo giryan tha wo giryan hai jo KHandan tha

bhala 'majzub' kuchh to hosh rakhte aise mauqa’ par

ghazab hai mezban banna paDa us ko jo mehman tha