عجب کیا گر مجھے عالم بایں وسعت بھی زنداں تھا

عجب کیا گر مجھے عالم بایں وسعت بھی زنداں تھا

میں وحشی بھی تو وہ ہوں لا مکاں جس کا بیاباں تھا

کسی کی یاد میں بیٹھے جو سب سے بے غرض ہو کر

تو اپنا بوریا بھی پھر ہمیں تخت سلیماں تھا

ذرا دیکھو تو یہ الٹی رسائی میری قسمت کی

وہ نکلا غیر کے دل سے جو میرے دل کا ارماں تھا

ہنسے بھی ہم تو مثل برق وہ ہنسنا ہنسے اے دل

کہ جس ہنسنے میں دنیا بھر کا رونا ہائے پنہاں تھا

جو رخ بدلا ہے ساقی نے دگر گوں رنگ محفل ہے

وہ خنداں ہے جو گریاں تھا وہ گریاں ہے جو خنداں تھا

بھلا مجذوبؔ کچھ تو ہوش رکھتے ایسے موقع پر

غضب ہے میزباں بننا پڑا اس کو جو مہماں تھا