bhulata hun phir bhi wo yaad aa rahe hain

bhulātā huuñ phir bhī vo yaad aa rahe haiñ

vahī chāhte haiñ maiñ kyā chāhtā huuñ

tere vasl kī taab kyā lā sakūñgā

ta'alluq faqat duur kā chāhtā huuñ

rahūñ zikr-o-tā'at meñ har-dam ilāhī

yahī 'umr-bhar mashġhala chāhtā huuñ

maiñ kab tak phirūñ dar-ba-dar mārā-mārā

tire dar pe ab baiThnā chāhtā huuñ

ba-vaqt-e-ḳhushī ho fanā kā tasavvur

masarrat bhī hasrat-fazā chāhtā huuñ

na apnā bhī jis meñ guzar ho ilāhī

ab aisī maiñ ḳhalvat-sarā chāhtā huuñ

maiñ 'majzūb' kab tak rahūñ mere maulā

bas ab hosh apne bajā chāhtā huuñ

bhulata hun phir bhi wo yaad aa rahe hain

wahi chahte hain main kya chahta hun

tere wasl ki tab kya la sakunga

ta'alluq faqat dur ka chahta hun

rahun zikr-o-ta'at mein har-dam ilahi

yahi 'umr-bhar mashghala chahta hun

main kab tak phirun dar-ba-dar mara-mara

tere dar pe ab baiThna chahta hun

ba-waqt-e-KHushi ho fana ka tasawwur

masarrat bhi hasrat-faza chahta hun

na apna bhi jis mein guzar ho ilahi

ab aisi main KHalwat-sara chahta hun

main 'majzub' kab tak rahun mere maula

bas ab hosh apne baja chahta hun