husn-e-pari ek jalwa-e-mastana hai us ka

husn-e-parī ik jalva-e-mastāna hai us kā

hoshiyār vahī hai ki jo dīvāna hai us kā

jo chashm ki hairāñ huī ā.īna hai us kī

jo siina ki sad-chāk huā shāna hai us kā

āvārgī-e-nik.hat-e-gul se hai ishāra

jaama se jo bāhar hai vo dīvāna hai us kā

giryāñ hai agar sham.a to sar dhuntā hai sho’ala

mā'lūm huā soḳhta parvāna hai us kā

vo yaad hai us kī ki bhulā de do-jahāñ ko

hālat ko kare ġhair vo yārāna hai us kā

yūsuf nahīñ jo haath lage chand dirham meñ

qīmat jo do-'ālam kī hai bai'āna hai us kā

dil qasr-e-shahanshāh hai vo shoḳh is meñ shahanshah

'arsa ye do-’ālam kā jalva-ḳhāna hai us kā

ye haal huā us ke faqīroñ se huvaidā

ālūda-e-duniyā jo hai begāna hai us kā

shukrāna-e-sāqiī azal karatā hai 'ātish'

mā'mūr mai-e-shauq se paimāna hai us kā

husn-e-pari ek jalwa-e-mastana hai us ka

hoshiyar wahi hai ki jo diwana hai us ka

jo chashm ki hairan hui aaina hai us ki

jo sina ki sad-chaak hua shana hai us ka

aawargi-e-nikhat-e-gul se hai ishaara

jama se jo bahar hai wo diwana hai us ka

giryan hai agar shama to sar dhunta hai sho’ala

ma'lum hua soKHta parwana hai us ka

wo yaad hai us ki ki bhula de do-jahan ko

haalat ko kare ghair wo yarana hai us ka

yusuf nahin jo hath lage chand dirham mein

qimat jo do-'alam ki hai bai'ana hai us ka

dil qasr-e-shahanshah hai wo shoKH is mein shahanshah

'arsa ye do-’alam ka jalwa-KHana hai us ka

ye haal hua us ke faqiron se huwaida

aaluda-e-duniya jo hai begana hai us ka

shukrana-e-saqii azal karata hai 'atish'

ma'mur mai-e-shauq se paimana hai us ka