habab-asa mein dam bharta hun teri aashnai ka

habāb-āsā meñ dam bhartā huuñ terī āshnā.ī kā

nihāyat ġham hai is qatre ko dariyā kī judā.ī kā

asiir ai dost tere ’āshiq-o-mā'shūq donoñ haiñ

giraftār āhanī-zanjīr kā ye vo tilā.ī kā

ta.alluq ruuh se tujh ko jasad kā nāgavārā hai

zamāna meñ chalan hai chaar din kī āshnā.ī kā

nazar aatī haiñ har sū sūrateñ hī sūrateñ mujh ko

koī ā.īna-ḳhāna kār-ḳhānā hai ḳhudā.ī kā

visāl-e-yār kā va.ada hai fardā-e-qayāmat par

yaqīñ mujh ko nahīñ hai gor tak apnī rasā.ī kā

dil apnā ā.īna hai saaf 'ishq-e-pāk rakhtā hai

tamāshā dekhtā hai husn is meñ ḳhud-numā.ī kā

nahīñ dekhā hai lekin tujh ko pahchānā hai ātish ne

bajā hai ai sanam jo tujh ko da.ava hai ḳhudā.ī kā

habab-asa mein dam bharta hun teri aashnai ka

nihayat gham hai is qatre ko dariya ki judai ka

asir ai dost tere ’ashiq-o-ma'shuq donon hain

giraftar aahani-zanjir ka ye wo tilai ka

talluq ruh se tujh ko jasad ka nagawara hai

zamana mein chalan hai chaar din ki aashnai ka

nazar aati hain har su suraten hi suraten mujh ko

koi aaina-KHana kar-KHana hai KHudai ka

visal-e-yar ka wada hai farda-e-qayamat par

yaqin mujh ko nahin hai gor tak apni rasai ka

dil apna aaina hai saf 'ishq-e-pak rakhta hai

tamasha dekhta hai husn is mein KHud-numai ka

nahin dekha hai lekin tujh ko pahchana hai aatish ne

baja hai ai sanam jo tujh ko dawa hai KHudai ka