misl-e-nagin jo humse hua kaam rah gaya

misl-e-nagīñ jo ham se huā kaam rah gayā

ham rū-siyāh jaate rahe naam rah gayā

yā rab ye dil hai yā koī mehmāñ-sarā.e hai

ġham rah gayā kabhū kabhū ārām rah gayā

saaqī mire bhī dil kī taraf Tuk nigāh kar

lab-e-tishna terī bazm meñ ye jaam rah gayā

sau baar soz-e-'ishq ne dī aag par hunūz

dil vo kabāb thā ki jigar ḳhaam rah gayā

ham kab ke chal base the barā-e-muzda-e-visāl

kuchh aaj hote-hote sar-anjām rah gayā

muddat se vo tapāk to mauqūf ho ga.e

ab gāh-gāh bosa ba-paiġhām rah gayā

az baski ham ne harf-e-duī kā uThā diyā

ai 'dard' apne vaqt meñ ib.hām rah gayā

misl-e-nagin jo hum se hua kaam rah gaya

hum ru-siyah jate rahe nam rah gaya

ya rab ye dil hai ya koi mehman-sarae hai

gham rah gaya kabhu kabhu aaram rah gaya

saqi mere bhi dil ki taraf Tuk nigah kar

lab-e-tishna teri bazm mein ye jam rah gaya

sau bar soz-e-'ishq ne di aag par hunuz

dil wo kabab tha ki jigar KHam rah gaya

hum kab ke chal base the bara-e-muzda-e-visal

kuchh aaj hote-hote sar-anjam rah gaya

muddat se wo tapak to mauquf ho gae

ab gah-gah bosa ba-paigham rah gaya

az baski hum ne harf-e-dui ka uTha diya

ai 'dard' apne waqt mein ibham rah gaya