مثل نگیں جو ہم سے ہوا کام رہ گیا

مثل نگیں جو ہم سے ہوا کام رہ گیا

ہم رو سیاہ جاتے رہے نام رہ گیا

یا رب یہ دل ہے یا کوئی مہماں سرائے ہے

غم رہ گیا کبھو کبھو آرام رہ گیا

ساقی مرے بھی دل کی طرف ٹک نگاہ کر

لب تشنہ تیری بزم میں یہ جام رہ گیا

سو بار سوز عشق نے دی آگ پر ہنوز

دل وہ کباب تھا کہ جگر خام رہ گیا

ہم کب کے چل بسے تھے برائے مژدہ وصال

کچھ آج ہوتے ہوتے سرانجام رہ گیا

مدت سے وہ تپاک تو موقوف ہو گئے

اب گاہ گاہ بوسہ بہ پیغام رہ گیا

از بس کہ ہم نے حرف دوئی کا اٹھا دیا

اے دردؔ اپنے وقت میں ابہام رہ گیا