baad az fana mazar pe aane se faida

baa'd az fanā mazār pe aane se fā.ida

marne se ham miTe to jalāne se fā.ida

ham se ulajh ke bigḌe to kākul bane kuchh aur

ai shāna un kī shaan banāne se fā.ida

āñkheñ milā.eñ ḳhaak na jab dil se dil mile

mil kar 'adū se aañkh milāne se fā.ida

jab bevafā.iyoñ kā tumhārī gilā nahīñ

bāteñ vafā kī ham ko sunāne se fā.ida

tar-e-nazar-e-jūyāñ se uThānā nahīñ merā

pahlū meñ phir 'adū ko biThāne se fā.ida

dil ḳhud shikār nāvak-e-mizhgāñ kā ho gayā

ruk ruk ke us pe tiir lagāne se fā.ida

ġhammāz ġhamza khol rahā hai lagāo meñ

mahfil meñ tum ko aañkh churāne se fā.ida

parde hoñ laakh par hoñ hamārī nigāh meñ

chhup-chhup ke bazm-e-ġhair meñ jaane se fā.ida

'nāsir' ḳhud aap sokHta-e-soz-e-’ishq hai

aise jale hue ko jalāne se fā.ida

ba'd az fana mazar pe aane se faida

marne se hum miTe to jalane se faida

hum se ulajh ke bigDe to kakul bane kuchh aur

ai shana un ki shan banane se faida

aankhen milaen KHak na jab dil se dil mile

mil kar 'adu se aankh milane se faida

jab bewafaiyon ka tumhaari gila nahin

baaten wafa ki hum ko sunane se faida

tar-e-nazar-e-juyan se uThana nahin mera

pahlu mein phir 'adu ko biThane se faida

dil KHud shikar nawak-e-mizhgan ka ho gaya

ruk ruk ke us pe tir lagane se faida

ghammaz ghamza khol raha hai lagao mein

mahfil mein tum ko aankh churane se faida

parde hon lakh par hon hamari nigah mein

chhup-chhup ke bazm-e-ghair mein jaane se faida

'nasir' KHud aap sokHta-e-soz-e-’ishq hai

aise jale hue ko jalane se faida