بعد از فنا مزار پہ آنے سے فائدہ

بعد از فنا مزار پہ آنے سے فائدہ

مرنے سے ہم مٹے تو جلانے سے فائدہ

ہم سے الجھ کے بگڑے تو کاکل بنے کچھ اور

اے شانہ ان کی شان بنانے سے فائدہ

آنکھیں ملائیں خاک نہ جب دل سے دل ملے

مل کر عدو سے آنکھ ملانے سے فائدہ

جب بے وفائیوں کا تمہاری گلا نہیں

باتیں وفا کی ہم کو سنانے سے فائدہ

تر نظر جویاں سے اٹھانا نہیں میرا

پہلو میں پھر عدو کو بٹھانے سے فائدہ

دل خود شکار ناوک مژگاں کا ہو گیا

رک رک کے اس پے تیر لگانے سے فائدہ

غماز غمزہ کھول رہا ہے لگاؤ میں

محفل میں تم کو آنکھ چرانے سے فائدہ

پردے ہوں لاکھ پر ہوں ہماری نگاہ میں

چھپ چھپ کے بزم غیر میں جانے سے فائدہ

ناصرؔ خود آپ سوختۂ سوز عشق ہے

ایسے جلے ہوئے کو جلانے سے فائدہ