khul gae zaKHmon ke munh kya jaane kya kahne ko hain

khul ga.e zaḳhmoñ ke muñh kyā jaane kyā kahne ko haiñ

kyā namak-dān-e-sitam ko be-mazā kahne ko haiñ

āshnā ākHir merī nā-āshnā.ī se to haiñ

hai ġhazab phir bhī mujhe nā-āshnā kahne ko haiñ

apnī jānib dekh kar rukH-e-nāla-e-dil-soz kā

dil jalā vo kahte kahte mubtalā kahne ko haiñ

qatl ke armān meñ ḳhuun hotī haiñ dil kī hasrateñ

kūcha-e-qātil ko ab ham karbalā kahne ko haiñ

sar na phoḌeñ apnā dīvāroñ se kyuuñ kar bul-havas

bazm-e-a.adā meñ mujhe vo āshnā ko haiñ

apnī hastī se guzar kar hast-mutlaq hoñge ham

kahte kahte al-fanā ham al-baqā kahne ko haiñ

'ālam-e-sūrat se ham yaksu-e-mā'nī meñ haiñ ġharīq

bahr-e-vahdat ke falak ko bulbulā kahne ko haiñ

ḳhaak apnī ho ga.ī iksīr pāmāl-e-sanam

aap ko ham hazrat-e-dil kīmiyā kahne ko haiñ

jalva vahdat kā dikhāyā kyā hijāb-e-nazm meñ

'nāsir' ham aap ko vahdat-numā kahne ko haiñ

khul gae zaKHmon ke munh kya jaane kya kahne ko hain

kya namak-dan-e-sitam ko be-maza kahne ko hain

aashna aakHir meri na-ashnai se to hain

hai ghazab phir bhi mujhe na-ashna kahne ko hain

apni jaanib dekh kar rukH-e-nala-e-dil-soz ka

dil jala wo kahte kahte mubtala kahne ko hain

qatl ke arman mein KHun hoti hain dil ki hasraten

kucha-e-qatil ko ab hum karbala kahne ko hain

sar na phoDen apna diwaron se kyun kar bul-hawas

bazm-e-ada mein mujhe wo aashna ko hain

apni hasti se guzar kar hast-mutlaq honge hum

kahte kahte al-fana hum al-baqa kahne ko hain

'alam-e-surat se hum yaksu-e-ma'ni mein hain ghariq

bahr-e-wahdat ke falak ko bulbula kahne ko hain

KHak apni ho gai iksir pamal-e-sanam

aap ko hum hazrat-e-dil kimiya kahne ko hain

jalwa wahdat ka dikhaya kya hijab-e-nazm mein

'nasir' hum aap ko wahdat-numa kahne ko hain