کھل گئے زخموں کے منہ کیا جانے کیا کہنے کو ہیں

کھل گئے زخموں کے منہ کیا جانے کیا کہنے کو ہیں

کیا نمک دان ستم کو بے مزا کہنے کو ہیں

آشنا آخر میری ناآشنائی سے تو ہیں

ہے غضب پھر بھی مجھے نا آشنا کہنے کو ہیں

اپنی جانب دیکھ کر رخ نالۂ دل سوز کا

دل جلا وہ کہتے کہتے مبتلا کہنے کو ہیں

قتل کے ارمان میں خون ہوتی ہیں دل کی حسرتیں

کوچۂ قاتل کو اب ہم کربلا کہنے کو ہیں

سر نہ پھوڑیں اپنا دیواروں سے کیوں کر بوالہوس

بزم اعدا میں مجھے وہ آشنا کو ہیں

اپنی ہستی سے گزر کر ہست مطلق ہوں گے ہم

کہتے کہتے الفنا ہم البقا کہنے کو ہیں

عالم صورت سے ہم یکسؤ معنی میں ہیں غریق

بحر وحدت کے فلک کو بلبلا کہنے کو ہیں

خاک اپنی ہو گئی اکسیر پامال صنم

آپ کو ہم حضرت دل کیمیا کہنے کو ہیں

جلوہ وحدت کا دکھایا کیا حجاب نظم میں

ناصرؔ ہم آپ کو وحدت نما کہنے کو ہیں