ye to bata de bahr-e-KHuda dil

ye to batā de bahr-e-ḳhudā dil

kis kī mohabbat meñ tū jalā dil

gardish-e-chashm-e-yār meñ aakar

surma-namat nāhaq ko lipā dil

āñkhoñ se āñkheñ aaj milā kar

shoḳh sitamgar le hī uḌā dil

pech-o-ḳham gesū-e-sanam meñ

aa.ī jo shāmat jā hī phañsā dil

koī but-e-tannāz meñ jākar

dekho mirā dil DhūñDo mirā dil

us ke liye sau rañj uThā.e

par na ye kāfir apnā huā dil

zulfeñ dikhā ke chehra dikhā ke

āsāñ nahīñ hai lenā mirā dil

dil kā patā siina meñ nahīñ hai

koī sitamgar le hī uḌā dil

chup jo sadā yuuñ rahte ho 'nāsir'

sach kaho kis dilbar se lagā dil

ye to bata de bahr-e-KHuda dil

kis ki mohabbat mein tu jala dil

gardish-e-chashm-e-yar mein aakar

surma-namat nahaq ko lipa dil

aankhon se aankhen aaj mila kar

shoKH sitamgar le hi uDa dil

pech-o-KHam gesu-e-sanam mein

aai jo shamat ja hi phansa dil

koi but-e-tannaz mein jakar

dekho mera dil DhunDo mera dil

us ke liye sau ranj uThae

par na ye kafir apna hua dil

zulfen dikha ke chehra dikha ke

aasan nahin hai lena mera dil

dil ka pata sina mein nahin hai

koi sitamgar le hi uDa dil

chup jo sada yun rahte ho 'nasir'

sach kaho kis dilbar se laga dil