یہ تو بتا دے بہر خدا دل

یہ تو بتا دے بہر خدا دل

کس کی محبت میں تو جلا دل

گردش چشم یار میں آکر

سرمہ نمط ناحق کو لپا دل

آنکھوں سے آنکھیں آج ملا کر

شوخ ستم گر لے ہی اڑا دل

پیچ و خم گیسوۓ صنم میں

آئی جو شامت جا ہی پھنسا دل

کوئی بت طناز میں جا کر

دیکھو مرا دل ڈھونڈو مرا دل

اس کے لئے سو رنج اٹھائے

پر نہ یہ کافر اپنا ہوا دل

زلفیں دکھا کے چہرہ دکھا کے

آساں نہیں ہے لینا مرا دل

دل کا پتا سینہ میں نہیں ہے

کوئی ستم گر لے ہی اڑا دل

چپ جو سدا یوں رہتے ہو ناصرؔ

سچ کہو کس دلبر سے لگا دل