mahfil-e-rindan mein jam mul ka hona chahiye

mahfil-e-rindāñ meñ jaam mul kā honā chāhiye

zohd kā qul ho chukā qulqul kā honā chāhiye

ik gul-e-dāġh-e-junūñ bas hai merī fariyād ko

bulbul-e-nālāñ ko sirf ik gul kā honā chāhiye

gulistān-e-dāġh-e-dil meñ hai ḳhayāl-e-zulf-e-yār

sahn meñ gulzār ke sumbul kā honā chāhiye

parda-e-zulmāt meñ mastūr hai āb-e-baqā

bar-sar-e-lab halqa-zan kākul kā honā chāhiye

dil hai merā nāla-zan yād-e-rukH-e-gulzār meñ

gul ke uupar nāla-e-bulbul kā honā chāhiye

qul-huvallāh ai sanam paḌhnā hamārī qabr par

turbat-e-muḳhlis pe aise qul kā honā chāhiye

rustaḳhez-e-hashr se kyā ḳhauf hai 'nāsir' tujhe

sar pe zill-e-peshvā-e-kul kā honā chāhiye

mahfil-e-rindan mein jam mul ka hona chahiye

zohd ka qul ho chuka qulqul ka hona chahiye

ek gul-e-dagh-e-junun bas hai meri fariyaad ko

bulbul-e-nalan ko sirf ek gul ka hona chahiye

gulistan-e-dagh-e-dil mein hai KHayal-e-zulf-e-yar

sahn mein gulzar ke sumbul ka hona chahiye

parda-e-zulmat mein mastur hai aab-e-baqa

bar-sar-e-lab halqa-zan kakul ka hona chahiye

dil hai mera nala-zan yaad-e-rukH-e-gulzar mein

gul ke upar nala-e-bulbul ka hona chahiye

qul-huwallah ai sanam paDhna hamari qabr par

turbat-e-muKHlis pe aise qul ka hona chahiye

rustaKHez-e-hashr se kya KHauf hai 'nasir' tujhe

sar pe zill-e-peshwa-e-kul ka hona chahiye