kis baat ka gham kis baat ka Dar pite hain aur aksar pite hain

kis baat kā ġham kis baat kā Dar piite haiñ aur aksar piite haiñ

ham pyāre nabī ke sadqe meñ paimāna-e-kausar piite haiñ

rindoñ kī dilerī to dekho zamzam kī banā kar piite haiñ

jannat kī ḳhabar zāhid jaane makke meñ to ghar ghar piite haiñ

har mast ke piine se pahle ka.abe kī taraf muñh hotā hai

dekho to ye kaise mai-kash haiñ masjid meñ bhī jā kar piite haiñ

sunte haiñ un ke īmāñ kā allāh nigahbāñ hotā hai

jo aap kī chashm-e-be-kHud se ai sāqī-e-kausar piite haiñ

ai hosh-o-ḳhirad ke matavālo sar-mastoñ kī mastī to dekho

tauba bhī barābar karte haiñ sahbā bhī barābar piite haiñ

us vaqt kā 'ālam kyā kahiye us vaqt kī rahmat kyā kahiye

jab sāqī-e-kausar ke mai-kash kausar se lipaT kar piite haiñ

us bazm kā har mai-kash 'anvar' āzād mujāhid hotā hai

jis bazm meñ lahrā-lahrā ke sab pīr-o-payamber piite haiñ

kis baat ka gham kis baat ka Dar pite hain aur aksar pite hain

hum pyare nabi ke sadqe mein paimana-e-kausar pite hain

rindon ki dileri to dekho zamzam ki bana kar pite hain

jannat ki KHabar zahid jaane makke mein to ghar ghar pite hain

har mast ke pine se pahle kabe ki taraf munh hota hai

dekho to ye kaise mai-kash hain masjid mein bhi ja kar pite hain

sunte hain un ke iman ka allah nigahban hota hai

jo aap ki chashm-e-be-kHud se ai saqi-e-kausar pite hain

ai hosh-o-KHirad ke matawalo sar-maston ki masti to dekho

tauba bhi barabar karte hain sahba bhi barabar pite hain

us waqt ka 'alam kya kahiye us waqt ki rahmat kya kahiye

jab saqi-e-kausar ke mai-kash kausar se lipaT kar pite hain

us bazm ka har mai-kash 'anwar' aazad mujahid hota hai

jis bazm mein lahra-lahra ke sab pir-o-payamber pite hain