کس بات کا غم کس بات کا ڈر پیتے ہیں اور اکثر پیتے ہیں

کس بات کا غم کس بات کا ڈر پیتے ہیں اور اکثر پیتے ہیں

ہم پیارے نبی کے صدقے میں پیمانۂ کوثر پیتے ہیں

رندوں کی دلیری تو دیکھو زمزم کی بنا کر پیتے ہیں

جنت کی خبر زاہد جانے مکے میں تو گھر گھر پیتے ہیں

ہر مست کے پینے سے پہلے کعبے کی طرف منہ ہوتا ہے

دیکھو تو یہ کیسے میکش ہیں مسجد میں بھی جا کر پیتے ہیں

سنتے ہیں ان کے ایماں کا اللہ نگہباں ہوتا ہے

جو آپ کی چشم بے خود سے اے ساقیٔ کوثر پیتے ہیں

اے ہوش و خرد کے متوالو سر مستوں کی مستی تو دیکھو

توبہ بھی برابر کرتے ہیں صہبا بھی برابر پیتے ہیں

اس وقت کا عالم کیا کہیے اس وقت کی رحمت کیا کہیے

جب ساقیٔ کوثر کے میکش کوثر سے لپٹ کر پیتے ہیں

اس بزم کا ہر میکش انورؔ آزاد مجاہد ہوتا ہے

جس بزم میں لہرا لہرا کے سب پیر و پیمبر پیتے ہیں