koi mushkil tha mahshar mein tumhein qatil bana dena

koī mushkil thā mahshar meñ tumheñ qātil banā denā

magar kuchh soch kar rahm aa gayā jaao du'ā denā

na pūchho kam-sinī meñ tum daġhā dene kī tarkībeñ

javānī aa.egī jab ḳhud sikhā degī daġhā denā

koī apnā zamāna yaad kar ke dil bhar aayā thā

jo ab aañsū koī dekho to mahfil se uThā denā

maiñ mujrim huuñ mujhe iqrār hai jurm-e-mohabbat kā

magar pahle ḳhatā par ġhaur kar lo phir sazā denā

maiñ is hālat meñ pahuñchā hashr vaale bhī pukār aTThe

koī fariyād vaalā aa rahā hai rāsta denā

ijāzat ho to kah duuñ qissa-e-ulfat sar-e-mahfil

mujhe kuchh to fasāna yaad hai kuchh tum sunā denā

'qamar' vo sab se chhup kar aa rahe haiñ fātiha paḌhne

kaheñ kis se ki merī sham'-e-furqat ko bujhā denā

koi mushkil tha mahshar mein tumhein qatil bana dena

magar kuchh soch kar rahm aa gaya jao du'a dena

na puchho kam-sini mein tum dagha dene ki tarkiben

jawani aaegi jab KHud sikha degi dagha dena

koi apna zamana yaad kar ke dil bhar aaya tha

jo ab aansu koi dekho to mahfil se uTha dena

main mujrim hun mujhe iqrar hai jurm-e-mohabbat ka

magar pahle KHata par ghaur kar lo phir saza dena

main is haalat mein pahuncha hashr wale bhi pukar aTThe

koi fariyaad wala aa raha hai rasta dena

ijazat ho to kah dun qissa-e-ulfat sar-e-mahfil

mujhe kuchh to fasana yaad hai kuchh tum suna dena

'qamar' wo sab se chhup kar aa rahe hain fatiha paDhne

kahen kis se ki meri sham'-e-furqat ko bujha dena