koi duniya-e-ata mein nahin hamta tera

koī duniyā-e-'atā meñ nahīñ hamtā terā

ho jo hātim ko muyassar ye nazārā terā

kah uThe dekh ke baḳhshish meñ ye rutba terā

vaah kyā jūd-o-karam hai sha-e-bathā terā

nahīñ suntā hī nahīñ māñgne vaalā terā

kuchh bashar hone ke naate tujhe ḳhud-sā jāneñ

aur kuchh mahz payāmī hī ḳhudā kā jāneñ

un kī auqāt hī kyā hai ki ye itnā jāneñ

farsh vaale tirī 'azmat kā ’ulū kyā jāneñ

ḳhusravāñ 'arsh pe uḌtā hai pharerā terā

jo tasavvur meñ tirā paikar-e-zebā dekheñ

rū-e-vashshams takeñ matl.a-e-sīmā dekheñ

kyuuñ bhalā ab vo kisī aur kā chehrā dekheñ

tere qadmoñ meñ jo haiñ ġhair kā muñh kyā dekheñ

kaun nazroñ pe chaḌhe dekh ke talvā terā

mujh se nāchīz pe hai terī ināyat kitnī

tū ne har gaam pe kī merī himāyat kitnī

kyā batā.ūñ tirī rahmat meñ hai vus'at kitnī

ek meñ kyā mire 'isyāñ kī haqīqat kitnī

mujh se sau laakh ko kaafī hai ishārā terā

ka.ī pushtoñ se ġhulāmī kā ye rishta hai bahāl

yahīñ tiflī-o-javānī ke bitā.e mah-o-sāl

ab buḌhāpe meñ ḳhudā-rā hameñ yuuñ dar se na Taal

tere TukḌoñ pe pale ġhair kī Thokar pe na Daal

jhiḌkiyāñ khā.īñ kahāñ chhoḌ ke sadqa terā

ġham-e-daurāñ se jo ghabrā.iye kis se kahiye

apnī uljhan ko batlā.īye kis se kahiye

chiir kar dil kise dikhlā.iye kis se kahiye

kisī kā muñh takiye kahāñ jā.iye kis se kahiye

tere hī qadmoñ pe miT jaa.e ye paalā terā

nazar-e-'ushshāq nabī hai ye mirā harf-e-ġharīb

mimbar-e-vā’z pe laḌte raheñ aapas meñ ḳhatīb

ye 'aqīda rahe allāh kare mujh ko nasīb

maiñ to mālik hī kahūñgā ki ho mālik ke habīb

yā'nī mahbūb-o-muhib meñ nahīñ merā terā

kHūgar-e-qurbat-o-dīdār pe kaisī guzre

kyā ḳhabar us ke dil-e-zār pe kaisī guzre

hijr meñ is tire bīmār pe kaisī guzre

duur kyā jāniye bad-kār pe kaisī guzre

tere hī dar pe mere be-kas-o-tanhā terā

tujh se har chand vo haiñ qadr-o-fazā.il meñ rafī’

kar 'nasīr' aaj magar fikr-e-razā kī tausī’

zīnat-e-nutq tire us kā ho ye she'r-e-vāqī’

terī sarkār meñ laatā hai razā us ko shafī’

jo mirā ġhaus hai aur lāDlā beTā terā

koi duniya-e-'ata mein nahin hamta tera

ho jo hatim ko muyassar ye nazara tera

kah uThe dekh ke baKHshish mein ye rutba tera

wah kya jud-o-karam hai sha-e-batha tera

nahin sunta hi nahin mangne wala tera

kuchh bashar hone ke nate tujhe KHud-sa jaanen

aur kuchh mahz payami hi KHuda ka jaanen

un ki auqat hi kya hai ki ye itna jaanen

farsh wale teri 'azmat ka ’ulu kya jaanen

KHusrawan 'arsh pe uDta hai pharera tera

jo tasawwur mein tera paikar-e-zeba dekhen

ru-e-washshams taken matla-e-sima dekhen

kyun bhala ab wo kisi aur ka chehra dekhen

tere qadmon mein jo hain ghair ka munh kya dekhen

kaun nazron pe chaDhe dekh ke talwa tera

mujh se nachiz pe hai teri inayat kitni

tu ne har gam pe ki meri himayat kitni

kya bataun teri rahmat mein hai wus'at kitni

ek mein kya mere 'isyan ki haqiqat kitni

mujh se sau lakh ko kafi hai ishaara tera

kai pushton se ghulami ka ye rishta hai bahaal

yahin tifli-o-jawani ke bitae mah-o-sal

ab buDhape mein KHuda-ra hamein yun dar se na Tal

tere TukDon pe pale ghair ki Thokar pe na Dal

jhiDkiyan khain kahan chhoD ke sadqa tera

gham-e-dauran se jo ghabraiye kis se kahiye

apni uljhan ko batlaiye kis se kahiye

chir kar dil kise dikhlaiye kis se kahiye

kisi ka munh takiye kahan jaiye kis se kahiye

tere hi qadmon pe miT jae ye pala tera

nazar-e-'ushshaq nabi hai ye mera harf-e-gharib

mimbar-e-wa’z pe laDte rahen aapas mein KHatib

ye 'aqida rahe allah kare mujh ko nasib

main to malik hi kahunga ki ho malik ke habib

ya'ni mahbub-o-muhib mein nahin mera tera

kHugar-e-qurbat-o-didar pe kaisi guzre

kya KHabar us ke dil-e-zar pe kaisi guzre

hijr mein is tere bimar pe kaisi guzre

dur kya jaaniye bad-kar pe kaisi guzre

tere hi dar pe mere be-kas-o-tanha tera

tujh se har chand wo hain qadr-o-fazail mein rafi’

kar 'nasir' aaj magar fikr-e-raza ki tausi’

zinat-e-nutq tere us ka ho ye she'r-e-waqi’

teri sarkar mein lata hai raza us ko shafi’

jo mera ghaus hai aur laDla beTa tera