kya-kya the aur kya-kya ho

kyā-kyā the aur kyā-kyā ho

tum bhī ek tamāsha ho

ba.ad-e-fanā jo zinda ho

piir ke aage murdā ho

nafs usī kā sīdhā ho

haath meñ jiske juutā ho

bande ho yā maulā ho

mere rab ho mirzā ho

aap hasīn-o-zebā ho

yaar magar be-parvā ho

dariyā simTe qatra ho

qatra phaile dariyā ho

ġhaur se dekho biinā ho

maiñ kyā huuñ aur tum kyā ho

bāzī-e-ishq nahīñ mahmil

jhūTā khele sachchā ho

merī to phūTīñ āñkheñ

gar koī tum sā dekhā ho

jo na yahāñ dekhe tum ko

mahshar meñ bhī andhā ho

hamne donoñ ko chhoḌā

uqbā ho yā duniyā ho

nafs tujhe maiñ kyā kosūñ

jā terā muñh kaalā ho

vahī ḳhudā ko paatā hai

ḳhud ko jisne khoyā ho

āñkhoñ meñ aisā vo samā.ae

jis ko dekho dhoka ho

nafs ko kījiye jitnā raast

misl-e-sag-e-dum TeḌhā ho

qaid se jo āzād huā

terā ho na merā ho

āshiq us ko kahte haiñ

apnī dhun kā pakkā ho

uryānī meñ laus kahāñ

dāman ho to dhabba ho

uljho tum jitnā suljhā.eñ

aap bhī gorakh-dhandā ho

aadam kā kyā bigḌe hai

naqsha bigḌe ḳhāka ho

insāñ hai go musht-e-ḳhāk

har sahrā meñ anqā ho

apne mohammad se kam hai

iisā ho yā muusā ho

jis ko kah deñ aap burā

buroñ meñ vo bhī achchhā ho

ishq meñ nāseh bhī hai dost

kare nasīhat duunā ho

jiskā nafs bane kāhil

us kī daal meñ kaalā ho

kuchh bhī nahīñ gar ho 'ulvī'

sab kuchh ho gar mirzā ho

kya-kya the aur kya-kya ho

tum bhi ek tamasha ho

baad-e-fana jo zinda ho

pir ke aage murda ho

nafs usi ka sidha ho

hath mein jiske juta ho

bande ho ya maula ho

mere rab ho mirza ho

aap hasin-o-zeba ho

yar magar be-parwa ho

dariya simTe qatra ho

qatra phaile dariya ho

ghaur se dekho bina ho

main kya hun aur tum kya ho

bazi-e-ishq nahin mahmil

jhuTa khele sachcha ho

meri to phuTin aankhen

gar koi tum sa dekha ho

jo na yahan dekhe tum ko

mahshar mein bhi andha ho

hamne donon ko chhoDa

uqba ho ya duniya ho

nafs tujhe main kya kosun

ja tera munh kala ho

wahi KHuda ko pata hai

KHud ko jisne khoya ho

aankhon mein aisa wo samaae

jis ko dekho dhoka ho

nafs ko kijiye jitna rast

misl-e-sag-e-dum TeDha ho

qaid se jo aazad hua

tera ho na mera ho

aashiq us ko kahte hain

apni dhun ka pakka ho

uryani mein laus kahan

daman ho to dhabba ho

uljho tum jitna suljhaen

aap bhi gorakh-dhanda ho

aadam ka kya bigDe hai

naqsha bigDe KHaka ho

insan hai go musht-e-KHak

har sahra mein anqa ho

apne mohammad se kam hai

isa ho ya musa ho

jis ko kah den aap bura

buron mein wo bhi achchha ho

ishq mein naseh bhi hai dost

kare nasihat duna ho

jiska nafs bane kahil

us ki dal mein kala ho

kuchh bhi nahin gar ho 'ulwi'

sab kuchh ho gar mirza ho