kyuñ jal gayā na tāb-e-ruḳh-e-yār dekh kar

kyuuñ jal gayā na tāb-e-ruḳh-e-yār dekh kar

jaltā huuñ apnī tāqat-e-dīdār dekh kar

ātish-parast kahte haiñ ahl-e-jahāñ mujhe

sargarm-e-nāla-hā-e-sharar-bār dekh kar

kyā ābrū-e-ishq jahāñ aam ho jafā

ruktā huuñ tum ko be-sabab āzār dekh kar

aatā hai mere qatl ko par josh-e-rashk se

martā huuñ us ke haath meñ talvār dekh kar

sābit huā hai gardan-e-mīnā pe ḳhūn-e-ḳhalq

larze hai mauj-e-mai tirī raftār dekh kar

vā-hasratā ki yaar ne khīñchā sitam se haath

ham ko harīs-e-lazzat-e-āzār dekh kar

bik jaate haiñ ham aap matā-e-suḳhan ke saath

lekin ayār-e-taba.a-e-ḳharīdār dekh kar

zunnār bāñdh sub.ha-e-sad-dāna toḌ Daal

rah-rau chale hai raah ko hamvār dekh kar

in ābloñ se paañv ke ghabrā gayā thā maiñ

jī ḳhush huā hai raah ko pur-ḳhār dekh kar

kyā bad-gumāñ hai mujh se ki ā.īne meñ mire

tuutī kā aks samjhe hai zañgār dekh kar

girnī thī ham pe barq-e-tajallī na tuur par

dete haiñ baada zarf-e-qadah-ḳhvār dekh kar

sar phoḌnā vo 'ġhālib'-e-shorīda haal kā

yaad aa gayā mujhe tirī dīvār dekh kar

kyuñ jal gayā na tāb-e-ruḳh-e-yār dekh kar

jaltā huñ apnī tāqat-e-dīdār dekh kar

ātish-parast kahte haiñ ahl-e-jahāñ mujhe

sargarm-e-nāla-hā-e-sharar-bār dekh kar

kyā ābrū-e-ishq jahāñ aam ho jafā

ruktā huñ tum ko be-sabab āzār dekh kar

aatā hai mere qatl ko par josh-e-rashk se

martā huñ us ke hath meñ talwār dekh kar

sābit huā hai gardan-e-mīnā pe ḳhūn-e-ḳhalq

larze hai mauj-e-mai tirī raftār dekh kar

wā-hasratā ki yar ne khīñchā sitam se hath

hum ko harīs-e-lazzat-e-āzār dekh kar

bik jate haiñ hum aap matā-e-suḳhan ke sath

lekin ayār-e-taba-e-ḳharīdār dekh kar

zunnār bāñdh subha-e-sad-dāna toḌ Dal

rah-rau chale hai rah ko hamwār dekh kar

in ābloñ se pañw ke ghabrā gayā thā maiñ

jī ḳhush huā hai rah ko pur-ḳhār dekh kar

kyā bad-gumāñ hai mujh se ki āīne meñ mere

tutī kā aks samjhe hai zañgār dekh kar

girnī thī hum pe barq-e-tajallī na tur par

dete haiñ baada zarf-e-qadah-ḳhwār dekh kar

sar phoḌnā wo 'ġhālib'-e-shorīda haal kā

yaad aa gayā mujhe tirī dīwār dekh kar