lāzim thā ki dekho mirā rastā koī din aur

lāzim thā ki dekho mirā rastā koī din aur

tanhā ga.e kyuuñ ab raho tanhā koī din aur

miT jā.egā sar gar tirā patthar na ghisegā

huuñ dar pe tire nāsiya-farsā koī din aur

aa.e ho kal aur aaj hī kahte ho ki jā.ūñ

maanā ki hamesha nahīñ achchhā koī din aur

jaate hue kahte ho qayāmat ko mileñge

kyā ḳhuub qayāmat kā hai goyā koī din aur

haañ ai falak-e-pīr javāñ thā abhī aarif

kyā terā bigaḌtā jo na martā koī din aur

tum māh-e-shab-e-chār-dahum the mire ghar ke

phir kyuuñ na rahā ghar kā vo naqshā koī din aur

tum kaun se the aise khare dād-o-sitad ke

kartā malak-ul-maut taqāzā koī din aur

mujh se tumheñ nafrat sahī nayyar se laḌā.ī

bachchoñ kā bhī dekhā na tamāshā koī din aur

guzrī na ba-har-hāl ye muddat ḳhush o nā-ḳhush

karnā thā javāñ-marg guzārā koī din aur

nādāñ ho jo kahte ho ki kyuuñ jiite haiñ 'ġhālib'

qismat meñ hai marne kī tamannā koī din aur

lāzim thā ki dekho mirā rastā koī din aur

tanhā gae kyuñ ab raho tanhā koī din aur

miT jāegā sar gar tirā patthar na ghisegā

huñ dar pe tere nāsiya-farsā koī din aur

aae ho kal aur aaj hī kahte ho ki jāūñ

manā ki hamesha nahīñ achchhā koī din aur

jate hue kahte ho qayāmat ko mileñge

kyā ḳhub qayāmat kā hai goyā koī din aur

hañ ai falak-e-pīr jawāñ thā abhī aarif

kyā terā bigaḌtā jo na martā koī din aur

tum māh-e-shab-e-chār-dahum the mere ghar ke

phir kyuñ na rahā ghar kā wo naqshā koī din aur

tum kaun se the aise khare dād-o-sitad ke

kartā malak-ul-maut taqāzā koī din aur

mujh se tumheñ nafrat sahī nayyar se laḌāī

bachchoñ kā bhī dekhā na tamāshā koī din aur

guzrī na ba-har-hāl ye muddat ḳhush o nā-ḳhush

karnā thā jawāñ-marg guzārā koī din aur

nādāñ ho jo kahte ho ki kyuñ jite haiñ 'ġhālib'

qismat meñ hai marne kī tamannā koī din aur