ghairon se mil ke humse kahan tak chhupaega

ġhairoñ se mil ke ham se kahāñ tak chhupā.egā

bosoñ kā niil muñh ke chhupā.e na jā.egā

hogī bahār-e-bāġh phir apnī nigāh meñ

parda jo apne ruḳh se vo gul-rū uThā.egā

jo jo karo sitam vo sanam sab saheñge ham

ġhairoñ se milnā ham se to dekhā na jā.egā

khātā huuñ roz ġham to samajhtā huuñ maiñ ki bas

ġham ek din zarūr mire dil ko khā.egā

ai ham-damoñ phireñge hamāre bhī din kabhī

kab tak hameñ ye gumbad-e-gardūñ satā.egā

mahshar bapā kiyā hai dil-e-be-qarār ne

naala ye merā 'arsh-e-mua'allā pe jā.egā

ik dam meñ sar-kashī use dikhlā.egī 'adam

koī agar habāb-sifat sar uThā.egā

ho jā.egī dobāra mujhe zindagī nasīb

qāsid ḳhabar jo us gul-e-rā'anā kī lā.egā

naama likheñge un ko to 'jauhar' likheñge kyā

daftar hai shauq-e-yār kā likkhā na jā.egā

ghairon se mil ke hum se kahan tak chhupaega

boson ka nil munh ke chhupae na jaega

hogi bahaar-e-bagh phir apni nigah mein

parda jo apne ruKH se wo gul-ru uThaega

jo jo karo sitam wo sanam sab sahenge hum

ghairon se milna hum se to dekha na jaega

khata hun roz gham to samajhta hun main ki bas

gham ek din zarur mere dil ko khaega

ai ham-damon phirenge hamare bhi din kabhi

kab tak hamein ye gumbad-e-gardun sataega

mahshar bapa kiya hai dil-e-be-qarar ne

nala ye mera 'arsh-e-mua'alla pe jaega

ek dam mein sar-kashi use dikhlaegi 'adam

koi agar habab-sifat sar uThaega

ho jaegi dobara mujhe zindagi nasib

qasid KHabar jo us gul-e-ra'ana ki laega

nama likhenge un ko to 'jauhar' likhenge kya

daftar hai shauq-e-yar ka likkha na jaega