ye kaise baal bikhre hain bani surat hai kyun gham ki

ye kaise baal bikhre haiñ banī sūrat hai kyuuñ ġham kī

ḳhabar paa.ī hai batlāo to kis dushman ke mātam kī

sahr kī yaad ne jhoñkā diyā ghar chal diyā vo but

muazzin ne azaañ dete hī bazm-e-’aish barham kī

na vo chashm-e-'ināyat hai na kuchh mehr-o-mohabbat hai

ḳhatā kyā ho ga.ī sāheb mohabbat kis liye kam kī

bañdhe haiñ taar ashkoñ ke kisī kī yaad meñ hamdam

'ajab hālat hai girya se hamāre chashm-e-pur-nam kī

nahīñ hai aap kā saanī hasīñ koī hasīnoñ meñ

tumhāre dam hī raunaq hai ai jaañ bazm-e-ālam kī

guloñ kī ham-nashīnī kā mazā paayā ye 'ālam meñ

ki sūrat ek sī miltī hai un ashkoñ se shabnam kī

fanā par yā baqā par kyā kareñ ham ġhaur ai hamdam

habāb-āsā hameñ is jā nahīñ fursat hai ik dam kī

hilāl-e-'īd kā naqsha mujhe goyā nazar aayā

tumhārī teġh-e-kHūñ-afshāñ jo mere sar pe aa chamkī

kisī bedād-gar ko dil to de baiThe nahīñ 'jauhar'

nahīñ kyuuñ shakl majnūñ kī ye sūrat kyuuñ banī ġham kī

ye kaise baal bikhre hain bani surat hai kyun gham ki

KHabar pai hai batlao to kis dushman ke matam ki

sahr ki yaad ne jhonka diya ghar chal diya wo but

muazzin ne azan dete hi bazm-e-’aish barham ki

na wo chashm-e-'inayat hai na kuchh mehr-o-mohabbat hai

KHata kya ho gai saheb mohabbat kis liye kam ki

bandhe hain tar ashkon ke kisi ki yaad mein hamdam

'ajab haalat hai girya se hamare chashm-e-pur-nam ki

nahin hai aap ka sani hasin koi hasinon mein

tumhaare dam hi raunaq hai ai jaan bazm-e-alam ki

gulon ki ham-nashini ka maza paya ye 'alam mein

ki surat ek si milti hai un ashkon se shabnam ki

fana par ya baqa par kya karen hum ghaur ai hamdam

habab-asa hamein is ja nahin fursat hai ek dam ki

hilal-e-'id ka naqsha mujhe goya nazar aaya

tumhaari tegh-e-kHun-afshan jo mere sar pe aa chamki

kisi bedad-gar ko dil to de baiThe nahin 'jauhar'

nahin kyun shakl majnun ki ye surat kyun bani gham ki