mahfil se unki sainkaDon pi kar nikal gae

mahfil se un kī saiñkaḌoñ pī kar nikal ga.e

mujh se milī jo aañkh to tevar badal ga.e

vo aisī qātilāna adāoñ meñ Dhal ga.e

zaḳhmī kiyā jo dil to kaleja masal ga.e

kuchh is tarah vo ham se bhī tevar badal ga.e

armān-o-ārzū ke janāze nikal ga.e

qismat bhiri to phir ga.e ahbāb is tarah

dekhā mujhe to duur se rasta badal ga.e

kyā sham-e-anjuman pe jalāne kā ittihām

jalnā hī thā nasīb meñ parvāne jal ga.e

dil ham se le ke un kī nigāheñ badal ga.iiñ

dhokā diyā fareb kiyā chaal chal ga.e

thakne lage jo paañv to yuuñ raah tai huī

is anjuman meñ ahl-e-vafā sar ke bal ga.e

is āstān-e-nāz kā jab tazkira huā

merī jabīn-e-shauq meñ sajde machal ga.e

un kā jamāl dekh ke dekhā jo ai 'nasīr'

qalb-o-nigāh husn ke sāñche meñ Dhal ga.e

mahfil se un ki sainkaDon pi kar nikal gae

mujh se mili jo aankh to tewar badal gae

wo aisi qatilana adaon mein Dhal gae

zaKHmi kiya jo dil to kaleja masal gae

kuchh is tarah wo hum se bhi tewar badal gae

arman-o-arzu ke janaze nikal gae

qismat bhiri to phir gae ahbab is tarah

dekha mujhe to dur se rasta badal gae

kya sham-e-anjuman pe jalane ka ittiham

jalna hi tha nasib mein parwane jal gae

dil hum se le ke un ki nigahen badal gain

dhoka diya fareb kiya chaal chal gae

thakne lage jo panw to yun rah tai hui

is anjuman mein ahl-e-wafa sar ke bal gae

is aastan-e-naz ka jab tazkira hua

meri jabin-e-shauq mein sajde machal gae

un ka jamal dekh ke dekha jo ai 'nasir'

qalb-o-nigah husn ke sanche mein Dhal gae