aa jamal-e-dost be-parda hamare dil mein aa

aa jamāl-e-dost be-parda hamāre dil meñ aa

tū nahīñ jis meñ usī ujḌī huī manzil meñ aa

kal hue the tūr-o-mūsā zauq-e-arenī kā shikār

aaj ai barq-e-tajallī phir hamāre dil meñ aa

'aish kā ḳhāliq bhī tū andoh kā ḳhāliq bhī tū

hāsil-e-ummīd ban kar kāsa-e-sā.il meñ aa

jo na ho āsān bandoñ se use āsān kar

jo baḌī mushkil ho maulā tū usī mushkil meñ aa

jazba-e-ḳhāmosh ko phir jur.at-e-guftār de

ārzū-e-dīd ban kar phir hamāre dil meñ aa

jām-e-dil kaif-e-sharāb-e-nūr se mā’mūr kar

ai ujāle ’arsh-e-ā’zm ke añdhere dil meñ aa

dil se ab tāb-e-firāq-o-zabt ruḳhsat ho ga.ī

husn vāloñ ke ḳhudā 'ishq ke hāmil meñ aa

nahnu-o-'aqrab kī sadā se raqs meñ aa.e lahū

ruuh ban kar mauja-e-ḳhūn-e-rag-e-bismil meñ aa

naza.a kī mushkil meñ huuñ maiñ aur bahut be-iḳhtiyār

ai mire mushkil-kushā tū hī mirī mushkil meñ aa

phir mohabbat hai butoñ kī aur musalmānoñ ke dil

partav-e-husn-e-azal phir un ke kāfir dil meñ aa

kashtī-e-islām hai aur turra-e-ummīd-o-bīm

nā-ḳhudāoñ ke ḳhudā is kashtī-o-sāhil meñ aa

har taraf se haq pe bātil kī chaḌhā.ī aaj hai

teġh-e-haq ban kar zarā jañg-e-haq-o-bātil meñ aa

imtihāñ kā vaqt hai īmān duuñ yā jaan duuñ

maiñ baḌī mushkil meñ huuñ maulā mirī mushkil meñ aa

rañg-e-’isyāñ se bahut dhuñdlā hai ab ye ā.īna

'aks jalva ban ke qalb ‘māhir’-e-kāmil meñ aa

aa jamal-e-dost be-parda hamare dil mein aa

tu nahin jis mein usi ujDi hui manzil mein aa

kal hue the tur-o-musa zauq-e-areni ka shikar

aaj ai barq-e-tajalli phir hamare dil mein aa

'aish ka KHaliq bhi tu andoh ka KHaliq bhi tu

hasil-e-ummid ban kar kasa-e-sail mein aa

jo na ho aasan bandon se use aasan kar

jo baDi mushkil ho maula tu usi mushkil mein aa

jazba-e-KHamosh ko phir jurat-e-guftar de

aarzu-e-did ban kar phir hamare dil mein aa

jam-e-dil kaif-e-sharab-e-nur se ma’mur kar

ai ujale ’arsh-e-a’zm ke andhere dil mein aa

dil se ab tab-e-firaq-o-zabt ruKHsat ho gai

husn walon ke KHuda 'ishq ke hamil mein aa

nahnu-o-'aqrab ki sada se raqs mein aae lahu

ruh ban kar mauja-e-KHun-e-rag-e-bismil mein aa

naza ki mushkil mein hun main aur bahut be-iKHtiyar

ai mere mushkil-kusha tu hi meri mushkil mein aa

phir mohabbat hai buton ki aur musalmanon ke dil

partaw-e-husn-e-azal phir un ke kafir dil mein aa

kashti-e-islam hai aur turra-e-ummid-o-bim

na-KHudaon ke KHuda is kashti-o-sahil mein aa

har taraf se haq pe baatil ki chaDhai aaj hai

tegh-e-haq ban kar zara jang-e-haq-o-baatil mein aa

imtihan ka waqt hai iman dun ya jaan dun

main baDi mushkil mein hun maula meri mushkil mein aa

rang-e-’isyan se bahut dhundla hai ab ye aaina

'aks jalwa ban ke qalb ‘mahir’-e-kaamil mein aa