آ جمال دوست بے پردہ ہمارے دل میں آ

آ جمال دوست بے پردہ ہمارے دل میں آ

تو نہیں جس میں اسی اجڑی ہوئی منزل میں آ

کل ہوئے تھے طور‌ و موسیٰ ذوق ارنی کا شکار

آج اے برق تجلی پھر ہمارے دل میں آ

عیش کا خالق بھی تو اندوہ کا خالق بھی تو

حاصل امید بن کر کاسۂ سائل میں آ

جو نہ ہو آسان بندوں سے اسے آسان کر

جو بڑی مشکل ہو مولیٰ تو اسی مشکل میں آ

جذبۂ خاموش کو پھر جرأت گفتار دے

آرزوئے دید بن کر پھر ہمارے دل میں آ

جام دل کیف شراب نور سے معمور کر

اے اجالے عرش اعظم کے اندھیرے دل میں آ

دل سے اب تاب فراق و ضبط رخصت ہو گئی

حسن والوں کے خدا عشق کے حامل میں آ

نحن و اقرب کی صدا سے رقص میں آئے لہو

روح بن کر موجہ خون رگ بسمل میں آ

نزع کی مشکل میں ہوں میں اور بہت بے اختیار

اے مرے مشکل کشا تو ہی مری مشکل میں آ

پھر محبت ہے بتوں کی اور مسلمانوں کے دل

پرتو حسن ازل پھر ان کے کافر دل میں آ

کشتیٔ اسلام ہے اور طرۂ امید و بیم

ناخداؤں کے خدا اس کشتئ و ساحل میں آ

ہر طرف سے حق پہ باطل کی چڑھائی آج ہے

تیغ حق بن کر ذرا جنگ حق و باطل میں آ

امتحاں کا وقت ہے ایمان دوں یا جان دوں

میں بڑی مشکل میں ہوں مولیٰ مری مشکل میں آ

رنگ عصیاں سے بہت دھندلا ہے اب یہ آئینہ

عکس جلوہ بن کے قلب ماہرؔ کامل میں آ