rahmat ko unki josh mein lane ki der hai

rahmat ko un kī josh meñ laane kī der hai

ya.anī sar-e-niyāz jhukāne kī der hai

piine kī der hai na pilāne kī der hai

saaqī ke bas nigāh uThāne kī der hai

parvāne aahī jā.eñge khiñch kar ba-jabr-e-ishq

mahfil meñ sirf sham.a jalāne kī der hai

āñkhoñ meñ dam hai āḳhrī hichkī kā vaqt hai

au be-niyāz bas tire aane kī der hai

ḳhud muztarib haiñ bāda-o-sāġhar kī jhalkiyāñ

saaqī kī samt haath baḌhāne kī der hai

vo bhī taḌap na jaa.eñ to is āshiqī par ḳhaak

mujh se faqat nigāh milāne kī der hai

jām-e-sharāb mast-ghaTā mutrib-o-bahār

sab aa chuke haiñ aap ke aane kī der hai

chilman kī bandishoñ meñ vo shāhid na ruk sakīñ

'māhir' ke sirf sher sunāne kī der hai

rahmat ko un ki josh mein lane ki der hai

yani sar-e-niyaz jhukane ki der hai

pine ki der hai na pilane ki der hai

saqi ke bas nigah uThane ki der hai

parwane aahi jaenge khinch kar ba-jabr-e-ishq

mahfil mein sirf shama jalane ki der hai

aankhon mein dam hai aaKHri hichki ka waqt hai

au be-niyaz bas tere aane ki der hai

KHud muztarib hain baada-o-saghar ki jhalkiyan

saqi ki samt hath baDhane ki der hai

wo bhi taDap na jaen to is aashiqi par KHak

mujh se faqat nigah milane ki der hai

jam-e-sharab mast-ghaTa mutrib-o-bahaar

sab aa chuke hain aap ke aane ki der hai

chilman ki bandishon mein wo shahid na ruk sakin

'mahir' ke sirf sher sunane ki der hai