wo tere haal se ghafil-e-dil nashad nahin

vo tire haal se ġhāfil-e-dil nāshād nahīñ

vo ye kahte haiñ mujhe fursat-e-bedād nahīñ

muskurāte hue phūloñ ne kahā shabnam se

fitrat-e-ġham se yahāñ koī bhī āzād nahīñ

maiñ ki ḳhud apnī jagah par bhī nahīñ huuñ maujūd

vo ki har-jā haiñ va-lekin kahīñ ābād nahīñ

merī har baat pe chehra mutaġhayyar kyuuñ hai

tum to kahte the koī baat mujhe yaad nahīñ

jaane kyā us kī nigāhoñ ne fusūñ phūñk diyā

dil kisī tarah bhī āmāda-e-fariyād nahīñ

maiñ taḌaptā huuñ faqat lutf kī ḳhātir 'māhir'

vo samajhte haiñ ki dil tishna-e-be-dād nahīñ

wo tere haal se ghafil-e-dil nashad nahin

wo ye kahte hain mujhe fursat-e-bedad nahin

muskuraate hue phulon ne kaha shabnam se

fitrat-e-gham se yahan koi bhi aazad nahin

main ki KHud apni jagah par bhi nahin hun maujud

wo ki har-ja hain wa-lekin kahin aabaad nahin

meri har baat pe chehra mutaghayyar kyun hai

tum to kahte the koi baat mujhe yaad nahin

jaane kya us ki nigahon ne fusun phunk diya

dil kisi tarah bhi aamada-e-fariyaad nahin

main taDapta hun faqat lutf ki KHatir 'mahir'

wo samajhte hain ki dil tishna-e-be-dad nahin