jo nazar kaamyab hoti hai

jo nazar kāmyāb hotī hai

aap apnā javāb hotī hai

zindagī jab azaab hotī hai

āshiqī kāmyāb hotī hai

tere aage latāfat-e-shabnam

sharm se aab aab hotī hai

rokiye apnī mast nazroñ ko

saarī duniyā ḳharāb hotī hai

jis surāhī ko chhū liyā tuune

ġhairat-e-āftāb hotī hai

yuuñ na maujoñ se khel ai ġhāfil

zindagānī habāb hotī hai

is chaman kī bahār kyā kahnā

pañkhuḌī bhī gulāb hotī hai

tujh se zālim ko pyaar karatā hai

jis kī qismat ḳharāb hotī hai

baḌhte jaate haiñ un ke ruḳh ke naqāb

har nazar ik hijāb hotī hai

naaz hai dil kī bekalī pe mujhe

shoḳhiyoñ kā javāb hotī hai

mast āñkhoñ kā dhyān aatā hai

sāmne jab sharāb hotī hai

un ke āshiq kī zindagī 'māhir'

kitnī nā-kāmyāb hotī hai

jo nazar kaamyab hoti hai

aap apna jawab hoti hai

zindagi jab azab hoti hai

aashiqi kaamyab hoti hai

tere aage latafat-e-shabnam

sharm se aab aab hoti hai

rokiye apni mast nazron ko

sari duniya KHarab hoti hai

jis surahi ko chhu liya tune

ghairat-e-aftab hoti hai

yun na maujon se khel ai ghafil

zindagani habab hoti hai

is chaman ki bahaar kya kahna

pankhuDi bhi gulab hoti hai

tujh se zalim ko pyar karata hai

jis ki qismat KHarab hoti hai

baDhte jate hain un ke ruKH ke naqab

har nazar ek hijab hoti hai

naz hai dil ki bekali pe mujhe

shoKHiyon ka jawab hoti hai

mast aankhon ka dhyan aata hai

samne jab sharab hoti hai

un ke aashiq ki zindagi 'mahir'

kitni na-kaamyab hoti hai